Сергей Лавров: «Килиимэт уларыйыытын кыһалҕатын быһаарарга өйү-санааны түмүөх тустаахпыт»

Килиимэт уларыйыытыгар уонна ирбэт тоҥу харыстааһыҥҥа анаммыт научнай практическай кэмпириэнсийэ пленарнай мунньаҕын кыттааччыларын Арассыыйа Тас дьыалаларга министиэристибэтин салайааччыта Сергей Лавров онлайн холбонон эҕэрдэлээтэ.

Кини кэмпириэнсийэ Саха сиригэр ыытыллара ордук оруннааҕын эттэ:

-Бу өр сыллаах ирбэт тоҥу чинчийиигэ билим уонна олох эйгэтигэр сөптөөх кыах, билии мунньуллубут эрэгийиэнэ. Онон кэмипириэнсийэ сөптөөх сиргэ тэриллибит. РФ Тас дьыалаларга министиэристибэтэ наука эйгэтигэр үлэлиир учуонайдар тас дойдуларга үлэлиир кэллиэгэлэрин кытта алтыһыыларын куруутун өйүүр. Килиимэт уларыйыыта аныгы кэм биир саамай тыҥаан турар кыһалҕата. Ол иһин киһи-аймах бастыҥ билиитин, өйүн-санаатын түмэр, холбуур олус суолталаах, — диэн эттэ Сергей Лавров.