Сергей Лавров Турция миниистирин кытары тугу кэпсэттэ

Арассыыйа тас дойдуларын дьыалаларыгар миниистир Сергей Лавров бэҕэһээ Турция Өрөспүүбүлүкэтин бэрэсидьиэнин Реджеп Тайип Эрдоганы, тас дойдулар дьыалаларыгар миниистири Мевлют Чавушоглуну кытары көрүстэ. Украинаны кытары сыһыан, бурдук дуогабарын, энергетика, о.д.а. боппуруостары кэпсэттилэр.

Турция миниистирэ Мевлют Чавушоглу суруналыыстары кытары көрсүһүүгэ, бастатан туран, сир хамсааһынын содулун туоратыыга Арассыыйа биир бастакынан көмөҕө кэлбитин бэлиэтээн туран, Арассыыйа салалтатыгар, дьонугар дириҥ махталын биллэрдэ. Санатан эттэххэ, Турцияҕа олунньу 6 күнүгэр улахан сир хамсааһыннара буоланнар, хомойуох иһин, 51 тыһыынчаттан тахса киһи суорума суолламмыта. Дьону быыһааһыҥҥа Арассыыйаттан 200-тэн тахса киһи, ол иһигэр быыһааччылар, быраастар, миэстэтигэр тиийэн үлэлээбиттэрэ. Аэромобильнай балыыһа, баһаары умуруорууга амфибия-сөмөлүөт тиийбитэ. Ону таһынан Арассыыйаттан гуманитарнай көмө оҥоһуллубута.

Икки миниистирдэр көрсүһүүлэригэр тас дойдулары кытары сыһыан биир сүрүн миэстэни ылла. Чуолаан, Сирия, Армения, Азербайджан, Ливия, Палестина, Израиль, Украина дойдуларын туһунан кэпсэттилэр. Сергей Лавров Украина туһунан этэригэр Арассыыйа биир остуол тула олорон кэпсэтиини ыытарга хаһан баҕарар бэлэмин иһитиннэрдэ.

— Бу кэпсэтиигэ Арассыыйа интэриэһэ көрүллүөхтээх, Холбоһуктаах Нациялар Түмсүүлэрин устааба тутуһуллуохтаах. Турциятааҕы биһиги кэллиэгэлэрбит ону өйдүүллэр уонна өйүүллэр. Оттон арҕааҥҥы дойдулар, Вашингтон салалтатынан, Киев эрэсиимин көҕүлүү олорон, биһиги интэриэспитин көрбөт буола сатыыллар. Киев, Вашингтон, Брюссель хас күн аайы уоттаах киирсиини тохтотумуохха,  кэпсэтиигэ кииримиэххэ дии олордохторуна хайдах биир остуол тула олорон кэпсэтэбит? – диэн этэр кини.

Маны таһынан тас дойдулары кытары сыһыаҥҥа бурдук дуогабарын туһунан кэпсэттилэр. Былырыын бэс ыйыгар Стамбулга түөрт өрүттээх (Арассыыйа, Украина, Турция, ХНТ) дуогабар түһэрсиллибитэ. Бу дуогабар тас дойдуларга, чуолаан экэниэмикэлэрэ мөлтөх дойдуларга, ас-үөл тиийбэт, кырыымчыгырар куттала үөскээн оҥоһуллубута. Украина уонна Арассыыйа бурдугу, уоҕурдууну, кукурузаны, о.д.а. бородууксуйаны таска таһааран атыылааһыҥҥа биир бастакы миэстэҕэ сылдьаллар.

— Билигин Украинаттан барар бурдук үс бырыһыана эрэ экэниэмикэлэрэ мөлтөх дойдуларга тиийэр. Арассыыйа экспортка кыайан бэйэтин бородууксуйатын таһаарбат. Дуогабарга этиллибит пууннар толоруллубаттар. Өскөтүн Украина бу дуогабарынан туһанар буоллаҕына, Арассыыйа чааһыгар этиллибит пууннар эмиэ толоруллуохтаахтар. Оччоҕуна эрэ бу дуогабары кырдьык үлэҕэ киирдэ диэххэ сөп, — диэн иһитиннэрэр Мевлют Чавушоглу.

Сергей Лавров манна даҕатан: “Арҕааҥҥы дойдулар бурдук, уоҕурдуу хааччахтанар бородууксуйалар буолбатахтар диэн этэллэр. Ол эрээри ону таска таһааран атыылыырга туох баар систиэмэ барыта тохтоон турар. SWIFT систиэмэҕэ биһиги суохпут, страховка үлэлээбэт, пуортарга киирии сабыылаах. Бу боппуруостар барыта быһаарыллыахтаахтар. Ол иһин биһиги бу дуогабары 60 күҥҥэ эрэ уһаттыбыт, өскөтүн кэнэҕэскитин туох да уларыйыы тахсыбатаҕына бу дуогабар биһиэхэ наадата суох буолан тахсар. Бородууксуйабытын атын дойдуларга да батарар кыахтаахпыт”, — диэн этэр.

Энергетика боппуруостарыгар сыһыаран, көрсүһүүгэ миниистирдэр муус устар 27 күнүгэр Турцияҕа “Аккую” атомнай электростанция үөрүүлээх аһыллыыта буолуоҕун эттилэр.

— Энергетика чааһыгар бу атомнай электростанция Турция экэниэмикэтигэр улахан оруолу ылар. Муус устар бүтэһигэр бастакы энергоблокка ядернай оттук кэлиэхтээх. Маны таһынан гаас атыытын туһунан кэпсэттибит. Аан дойду үрдүнэн уларыйыы-тэлэрийии буола турар кэмигэр, бу сөптөөх быһаарыныы, — диэн этэр миниистир Сергей Лавров.