Сергей Местников: «Ил Дархан тыа хаһаайыстыбатын бородууксуйатын элбэтиигэ соруктары туруорда»

СӨ Бырабыыталыстыбатын бэрэссэдээтэлин солбуйааччы Сергей Местников Ил Дархан Айсен Николаев Ил Түмэҥҥэ туһаайан этиитин тула санаатын үллэһиннэ:

— Ил Дархан тыа хаһаайыстыбатын хайысхаларынан оҥорон таһаарыы бородууксуйатын элбэтэр туһунан соруйда. Бу туһунан биһиги 2030 сылга диэри тутуһар Айсен Николаев Стратегическай ыйааҕар баар. Итиэннэ кини кэлэр сылтан муниципальнай тэриллиилэр баһылыктарын боломуочуйалара тыа хаһаайыстыбатыгар кэҥиэхтэрэ диэн эттэ. Улуустар инники күөҥҥэ тутар хайысхаларын бэйэлэрэ быһаарар буолуохтара. Маныаха баһылыктар эппиэтинэстээхтик сыһыаннаһалларыгар эрэнэбин.

Айсен Николаев оскуола иннинээҕи саастаах оҕолор уонна үөрэнээччилэр төрүт тылларынан — аҕыйах ахсааннаах норуоттар уонна саха тылларынан саҥараллара аҕыйаан иһэрин бэлиэтээтэ. Онон кини үөрэхтээһин систиэмэтигэр оҕолор төрүт тылларын үөрэтэллэригэр, билэллэригэр болҕомто уурарга соруйда.