Сергей Местников: «Нерюнгри олохтоохторо ыалдьыт буолбатахтар, тэрийээччилэр»

Бырабыыталыстыба бэрэссэдээтэлин солбуйааччы, Олоҥхо ыһыаҕын өрөспүүбүлүкэтээҕи тэрийэр хамыыһыйатын бэрэссэдээтэлэ Сергей Местников санаатын үллэһиннэ:

— Олоҥхо ыһыаҕар бэлэмнэнии икки сыл инниттэн саҕаланар. Сүрүн бэлэмнэнии үлэтэ элбэх хайысханан былырыыҥҥыттан саҕаламмыта. Төһө да ыраах буоллар, бары кэриэтэ улуустартан дэлэгээссийэлэр кэллилэр. Онуоха суола-ииһэ үчүгэйэ тоҕоостоох. Элбэх дьон-сэргэ тоҕуоруспута киһини үөрдэр. Нерюнгри оройуонун баһылыга Роман Щегельняк ыҥырыытынан, Кытайтан дэлэгээссийэ кэллэ. Нерюнгри өрөспүүбүлүкэтээҕи ыһыаҕы көрсөргө бэлэм диэн көрдүм.

Быйылгы ыһыах сүрүн өйдөбүллэрэ — доҕордоһуу, түмсүү, таптал. Нерюнгри оройуонугар элбэх омук иллээхтик-эйэлээхтик олорор. Онно норуоттар култуураларын билиһиннэрии, хардарыта байытыһыы буолар. Бу ил, эйэ, түмсүү бырааһынньыга. Нерюнгри олохтоохторо ыалдьытымсахтарын көрдөрөллөр, үөрэ-көтө көрсөллөр. Бастаан Олоҥхо ыһыаҕын тэрийиигэ кыттыһаллара уустук соҕус этэ. Ол иһин биһиги сүрүн ирдэбилбит — олохтоохтор ыһыахха ыалдьыт эрэ буолбакка, тэрээһинигэр кыттыһыахтаахтар, өйдөрүнэн-санааларынан ылыныахтаахтар диэн этэ. Эрдэттэн элбэх туһааннаах көрсүһүүлэр, үөрэтэр сэминээрдэр, кэмпириэнсийэлэр, төгүрүк остуоллар буолбуттара. Ол түмүгүн бүгүн көрөбүт. Биһиги төрүт култуурабытыгар олус чугаһаатылар. Онно улахан үлэни оройуон баһылыга Роман Щегельняк ыытта. Кини бары ымпыгын-чымпыгын билэн, туоһулаһан, сахалыы тыллары үөрэтэн, бэйэтинэн үтүө холобуру көрдөрдө. Онон Олоҥхо ыһыаҕа ситиһиилээхтик ааһарыгар эрэллээхпин!