Сергей Местников: «Тыллар араастарын харыстааһыҥҥа уонна сайыннарыыга систиэмэлээх үлэ ыытыллар»

СӨ Бырабыыталыстыбатын Бэрэссэдээтэлин солбуйааччы Сергей Местников, дойду Бэрэсидьиэнин Владимир Путин быһа эпиирин кэннэ, өрөспүүбүлүкэҕэ култууралар араастарын, төрөөбүт тыллары харыстааһыҥҥа уонна сайыннарыыга биир кэм үлэ ыытылларын, уонна кэлэр сылга өрөспүүбүлүкэ таһымыгар Норуоттар сомоҕолоһууларын сылын дьаһаллара олоххо киириэхтэрин бэлиэтээтэ.

«Дойду Бэрэсидьиэнэ Владимир Владимирович Путин биһиги саха суруналыыспыт боппуруоһугар норуоттар сомоҕолоһууларын уонна ити хайысхаҕа федеральнай таһымҥа ыытыллар үлэ туһунан олус дириҥ ис хоһоонноох хоруйу биэрдэ. Дьиҥинэн, биһиги федеральнай киин өттүттэн төрөөбүт тыллары, култууралар араастарын харыстыырга уонна сайыннарарга туһуламмыт судаарыстыбаннай бэлиитикэни билэбит-көрөбүт. Бу, дьиҥэр, бүтүн дойду сомоҕолоһуута олоҕурар сүрүн идиэйэлэрэ буолаллар. Бэрэсидьиэн эппитин курдук, өрөспүүбүлүкэ норуота — олус талааннаах, бэйэтин култууратыгар, үгэстэригэр, төрөөбүт тылларыгар харыстабыллаахтык сыһыаннаһар. Уонна биһиги култуураҕа, норуоттар үгэстэригэр, төрөөбүт тылларга таптал уонна ытыктабыл күүһүрэ турарын уонна көлүөнэттэн көлүөнэҕэ бэриллэрин туһугар барытын оҥоруохпут», — диэн Сергей Местников эттэ.