Ангелина Васильева хаартыскаҕа түһэриитэ
Ахсынньыга киинэ, тыйаатыр режиссера, СӨ ускуустубатын үтүөлээх диэйэтэлэ Сергей Потапов 50 сааһын туолбутунан, «Потапов-Фест» бэстибээл саҕаланна.
Бүгүн, ахсынньы 4 күнүгэр, «Лена» киинэ тыйаатырыгар «Ньургуһуннар» киинэни көрдөрдүлэр.
«Ньургуһуннар» киинэ 2013 сыллаахха уһуллубута. Мелодрама, арт-хаус жанрдаах. Сценарийын Сергей Потапов бэйэтэ суруйбута, режиссердаабыта. Семен Аманатов оператордаабыта. Муусукатын Николай Михеев суруйбута. Сүрүн оруолларга Геннадий Турантаев, Кирсан Васильев, Роман Дорофеев, Зоя Попова уһуллубуттара.
2013 сыллаахха »Кинопрорыв» бэстибээлгэ »Бастыҥ оператор үлэтэ», эһиилигэр Чебоксарыга норуоттар икки ардыларынааҕы киинэ бэстибээлигэр »Бастыҥ режиссер үлэтэ» уонна »Бастыҥ артыыс үлэтэ» ааттары ылбыта.
— Барыта уонча киинэлээхпин. Бу киинэ уонтан тахса сыллааҕыта уһуллубута. Семен Аманатов этиитинэн, бу киинэҕэ барытын турар камеранан устубуппут. Манна мин сиэн быраатым Кирсан уһуллубута, кини билигин номнуо устудьуон. Оччолорго Дьокуускайга кыһыннары ньургуһуну үүннэрэр оҕонньор баара, кини биһиэхэ олус көмөлөспүтэ, — диэн Сергей Потапов кэпсээтэ.
— Тоҕус эрэ күн, баччаларга, тыбыс-тымныыга устубуппут. Дьэ, тоҥон аҕай биэрбиппит. Сценарийа Сергей төбөтүгэр эрэ баара, онон сарсыныгар туохха, хайдах уһулларбытын билбэт этибит, — диэн Геннадий Турантаев кэпсээтэ.
»Ньургуһуннар» киинэ ис хоһооно ыалдьар уол уонна аҥаардас эр киһи доҕордоһууларын, истиҥ сыһыан өрөгөйдүүрүн туһунан. Пьер Ришар оонньуур »Игрушка» киинэҕэ майгынныыр, ол эрээри манна баай уол үтүө санаалаах. Хайдах эрэ »Леон» киинэҕэ эмиэ майгынныыр диэн көрдүм. Улахан баҕайы эр киһи уонна оҕо доҕордоһоллорун туһунан. Сергей Потапов мелодраманы эмиэ устар эбит ээ диэн, бэйэбэр арыйыыны оҥордум.
Киинэ тугунан бүтэрэ эмиэ суолталаах. »Ньургуһуннар» — сылаас тыыннаах, истиҥ киинэ.
Бу нэдиэлэ устата »Лена» киинэ тыйаатырын кыра саалатыгар Сергей Потапов киинэлэрэ көстүөхтэрэ.
Ангелина Васильева.
Ааптар түһэриилэрэ.
Тохсунньу саҕаланыаҕыттан Дьокуускайга саастарын ситэ илик оҕолор уруулга олорон, иккитэ массыына саахалланыытын таһаардылар. Тохсунньу 8…
Бу көҕүлээһининэн Уопсастыбаннай балаата дьарыктана сылдьар. "Дьиэ кэргэн стипендията" ый аайы төлөнүөҕэ уонна тиийинэн олоруу…
Авиахампаанньалар кулун тутар 1 күнүттэн пассажирдарга эрдэттэн көтүү усулуобуйатын, билиэккэ киирбит уларыйыылар, көтүүттэн аккаастаныы уонна…
Уус Маайа улууһун борокуратуурата дьахтарга көрүллүбүт күһэлэҥ үлэни накаастабыл атын көрүҥүнэн солбуйар туһунан суут көрбүт…
Нам улууһун Аппааны сэлиэнньэтигэр “Култуура” национальнай бырайыагынан 2022 сыллаахха тутуллубут Култуура дьиэтигэр наадалаах малы-салы киинэни…
Арассыыйаҕа ипэтиэкэни хос аахтарыыга (рефинансированиеҕа) киирэр уларыйыылар олунньу 1 күнүттэн олоххо киириэхтэрэ – комбинированнай ипэтиэкэ…