Сергей Потаповка аналлаах бэстибээл түмүктэннэ

Билиҥҥи кэм биир уһулуччулаах режиссера, СӨ ускуустубатын үтүөлээх диэйэтэлэ, тыйаатыр уонна киинэ режиссера, Арассыыйа Тыйаатырдарын диэйэтэллэрин уонна  Арассыыйа Кинематографистарын сойуустарын чилиэнэ  Сергей Потапов 50 сааһыгар аналлаах тыйаатыр уонна киинэ бэстибээлэ бэҕэһээ, ахсынньы 14 күнүгэр, Михаил Булгаков “Маастар уонна Маргарита” испэктээгинэн түмүктэннэ.

Саха сирин көрөөччүлэрэ, Сергей Потапов  талааныгар сүгүрүйээччилэр уонна атын эрэгийиэннэртэн кэлбит ыалдьыттар кини туруорбут киинэлэрин, испэктээктэрин куорат хас да тыйаатырыгар көрдүлэр, сорох үлэлэри саҥалыы, атын хараҕынан ылыннылар. Аҥаардас ити  даҕаны Сергей Потапов режиссер быһыытынан ыҥырыыга сылдьарын, өрөспүүбүлүкэ тыйаатырдара кинилиин бииргэ үлэлиэхтэрин баҕаралларын туоһулуур.

Сэбиэскэй кэм суруйааччыта, быраас, драматург, тыйаатыр режиссера уонна артыыһа Михаил Булгаков “Маастар уонна Маргарита” испэктээгин туруорарга сананыы – бэйэтэ хорсун быһыы.

Саха тыйаатырын дириэктэрэ Петр Макаров режиссер Сергей Потапов туруоруулара күн аайы толору көрөөччүлээх саалаҕа барбыттарын, кини үлэлээбитин тухары  сүүстэн тахса испэктээги туруоран, көрөөччүгэ бэлэхтээбитин  астына бэлиэтээтэ.

СӨ култуура уонна духуобунай сайдыы миниистирэ Афанасий Ноев:  “Сергей Станиславович  120 сыл устуоруйалаах тыйаатырга үлэлиир дьоллоох киһи, бу сыллар тухары үүнэн-сайдан, биһиги киэн туттар режиссербутунан буолла. Кини улуу учууталларга уһуйуллан,  классическай тыйаатыр  үөрэҕин ылла.  Саха тыйаатырын эрэ буолбакка, Арассыыйа уонна аан дойду тыйаатырдарын чаҕылхай артыыстарын уонна кэлэктииптэрин кытары алтыһан, сайдар уонна байар. Ол духуобунай баайыттан  биһиэхэ бэрсэ сылдьарынан, үллэстэринэн өссө төгүл киэн туттабын”, — диэн дьоһун сааһын туолбут режиссерга өссө да ситиһиилэри баҕарда уонна СӨ Бырабыыталыстыбатын, СӨ култуура уонна духуобунай сайдыы министиэристибэтин Махтал суруктарын туттарда.

“Режиссердарга табыллыбыт кэлэктииппит”

Саха тыйаатырын уус-уран салайааччыта Андрей Борисов тыйаатыр  ускуустубата сайдарыгар бэйэлэрин  кылааттарын киллэрэн үлэлээн-хамсаан ааспыт режиссердар Спиридон Григорьевы, Федот Потаповы, Василий Фомины ахтан-санаан ааста. “Оттон биһиги  бүгүҥҥү үбүлүөйдээх уолбут  Сергейбит хаһан эрэ Марк Захаров оскуола-устуудьуйатыгар киирбитин истэн баран, киэн туттубуппут. Билигин Саха тыйаатыра эн талааҥҥынан эрэ буолбакка, Арассыыйаҕа эн ааккынан бэстибээл тэриллэринэн киэн туттар. Биһиги режиссердарбытыгар табыллыбыт кэлэктииппит. Хас биирдии көрөөччү араас хайысханан үлэлиир режиссердаах. Биһиэхэ Сергей Потапов, соторутааҕыта Чебоксарыга ыытыллыбыт бэстибээл үрдүк наҕараадатын ылан кэлбит Руслан Тараховскай бааллар. Сергей Станиславович, өссө да бу курдук үлэлии-хамсыы сырыт, эйигиттэн өссө да элбэх арыллыыны, кэрэхсэбиллээх туруоруулары күүтэбит, мэлдьи да биһигини соһута, үөрдэ сырыт!” – диэн үйэлээх испэктээктэри туруорарыгар баҕа санаатын тириэртэ.

“… Күлүгээннии, көрдөөх-нардаах, элэктээх туруоруулардаах режиссер”

Тыйаатыр кириитигэ, Сергей Потаповтыын биир кэмҥэ үөрэммит  Глеб Ситковскай:

“Мин лиэксийэлэрбэр национальнай тыйаатырдар тустарынан кэпсиибин. Саха тыйаатырын туһунан кэпсэтии куруук уратылаах буолар. Тоҕо диэтэххэ, Арассыыйа тыйаатырдарын  үгэстэрин илдьэ сылдьаҕыт, олус элбэх тыйаатырдаах уонна көрөөччүлээх тыйаатыр буоларгытынан киэн туттабын.  Дьиктитэ диэн, Олоҥхо тыйаатыра эһиэхэ уруккуттан баарын курдук саныыбын. Тыйаатыр сайдан иһиэхтээх. Сергей Потапов “Макбет” диэн бастакы туруоруута 2005 с. “Кыһыл көмүс мааска” бириэмийэни ылбыта!  Сергей Станиславович чахчы Саха сиригэр эрэ буолбакка, Арассыыйаҕа уонна омук дойдуларыгар биир саамай наадыйар уонна сыаналыыр режиссердара. Кини учуутала Марк Захаров курдук,  ханнык баҕарар тыйаатыр испэктээктэрин  аныгы көрүүнэн, күлүгээннии, көрдөөх-нардаах, элэктээх гына  туруоран барбыта. Онон, Сергей Потапов баар буолан, Саха тыйаатыра ураты тыыннаах”, — диэн үрдүк сыанабылы биэрдэ.

Үс режиссердаах тыйаатыр уонна үс атахтаах чороон…

 Тыйаатыр сүрүн режиссера Руслан Тараховскай   судаарыстыба идеологиятын оҥорор сакаастары тыйаатырга элбэхтик биэрэллэригэр баҕа санаатын эттэ. Андрей Борисов Саха тыйаатырын 3 атахтаах чорооҥҥо тэҥнээбит буоллаҕына, Руслан Тараховскай Саха тыйаатырын  3 режиссера тыйаатыры  өссө да сайыннара туруоҕар  эрэлин биллэрдэ. Онуоха көрөөччүлэр ытыстарын харыстаабакка таһыннылар.

Петр Макаров  “Тыйаатырга уһулуччулаах режиссердар Андрей Борисов, Руслан Тараховскай уонна Сергей Потапов баалларын тухары Саха тыйаатыра сахалыы тыллаах, сахалыы тыыннаах испэктээктэри көрдөрө туруоҕа”, — диэн көрөөччүлэри “Маастар уонна Маргарита” туруорууну көрөргө ыҥырда.

“Маастар уонна Маргарита” испэктээги режиссер Сергей Потапов хара бастакыттан бэйэтин көрүүтүнэн, ол эбэтэр айымньы дьоруойдарын кытары кэпсэтиитин курдук толкуйдаан туруорда. Көстүү барыта Дьокуускай куоракка, бэл куорат таһынааҕы Хатаска буолар. Ол тухары хара уонна үрүҥ, мөкү уонна үтүө санаа сиэттиһэ сылдьаллар. Онуоха ким кыайыаҕа биллибэт. Көрөөччү онно соччо  наадыйбат да курдук. Ол оннугар итэҕэл, олох сыаннастарын, киһи аймах орто дойдуга эппиэтинэһин уо.д.а. туһунан толкуйдуу сатыыр…