Сергей Протопопов: «Өрөспүүбүлүкэ ыччата Бастакы Бэрэсидьиэммитин дириҥник ытыктыыр»

Сергей Протопопов, «Бунтар» ИТ-тэрилтэ салайааччыта:

— Өрөспүүбүлукэбит норуота ураты сайдыылаах, киэҥ билиилээх, дьоһун үөрэхтээх, күүстээх санаалаах буоларын туhугар Михаил Ефимович олоҕун бүүс-бүтүннүү анаабыт биhиги бары дириҥник ытыктыыр, сүгүрүйэр салайааччыбыт. Кини биир саамай ураты бэлиэтинэн — хайа баҕарар көлүөнэ киһитин кытта биир тылы булан иһирэхтик кэпсэтэрэ, өйдөтөрө буолар. Михаил Ефимович ыччаты кытта тиһигин быспакка алтыһара, аныгы ыччат баҕа санаатын, дьулуһар сыалын, туруорунар соругун илэ-чахчы билэр, өйдүүр, өйүүр этэ. Аныгы ыччат үөрэххэ, билиигэ, сайдыыга тардыһарыгар, үүнэригэр сирдиирэ, сүбэлиирэ. Өрөспүүбүлүкэ ыччата Бастакы Бэрэсидьиэммитин дириҥник ытыктыыр, үрдүктүк сыаналыыр мындыр киhибит.