Сергей Винокуров: «Бу туһаайыы этииттэн биһиги Арассыыйабыт өссө сайдыбытын, күүһүрбүтүн уонна кыаҕырбытын өйдөөтүбүт»

Арассыыйа Бэрэсидьиэнэ Владимир Путин Федеральнай Мунньахха туһаайбыт Анал этиитинэн Бүлүү улууһун баһылыга Сергей Винокуров санаатын үллэстэр:

— Дойду аҕа баһылыга Владимир Путин РФ Федеральнай Мунньаҕар туһаайбыт Анал этиитин Бүлүү улууһун дьаһалтатын салалтатын салайааччылара уонна оройуон сэбиэтин мунньаҕын дьокутааттара бары бииргэ иһиттибит. Дойду Бэрэсидьиэнэ маннык дириҥ ис хоһоонноох, киэҥ хабааннаах этиитин өссө истэ илик этибит. Икки чаас устата биһиги лиидэрбит тыл эттэ итиэннэ бары хайысханы таарыйда – бу чугастааҕы биэс-алта сыллааҕы былаан буолар. Онно норуот хаһаайыстыбатын бары салааларын сайыннарыыга үбүнэн өйөбүл туһунан этилиннэ. Бу Анал этиини биһиги өссө ырытан өйдүөхтээхпит, тоҕо диэтэххэ олус киэҥ уонна дириҥ ис хоһоонноох.

Бу туһаайыы этииттэн биһиги Арассыыйабыт өссө сайдыбытын, күүһүрбүтүн уонна кыаҕырбытын өйдөөтүбүт. Биһиги Бэрэсидьиэммит аан дойду таһымнаах дьиҥнээх лиидэр буоларын көрдөрдө. Бу Анал этииттэн көрдөххө, Арассыыйа билиҥҥи кэмҥэ аан дойдуга улахан оруолу ылар. Арассыыйата суох аан дойдуга киһи цивилизацията сайдыан сатаан санаабаппын.

Дойду баһылыгын бүгүҥҥү этиитэ элбэҕи уларытыа дии саныыбын, кини этэринэн, Арассыыйа атаҕар бигэтик турар, биһиги дойдубут сайдарыгар эрэллээх, норуота өйүүрүгэр эрэллээх уонна биһиги анал байыаннай дьайыыттан кыайыылаах тахсыахпыт. Бу хаһааҥҥытааҕар даҕаны ураты анал этии, туһаайыы буолар, онон биһиги дойдубут мантан инньэ атын, модун күүстээх буоларыгар, биһиги олохпут уйгута тупсарыгар, сайдарыгар олук буолуо диэн эрэнэбин.