«Сэргэй Зверев-Кыыл Уола үөскээбит эйгэтэ уонна айымньылаах алтыһыыта» кинигэ сүрэхтэннэ

Быйыл аатырбыт тойуксут, түһүлгэлээх үҥкүүһүт  Сергей Афанасьевич Зверев-Кыыл Уола төрөөбүтэ 125 сыла бэлиэтэнэр. Бу бэлиэ датаҕа сөп түбэһиннэрэн «Сэргэй Зверев-Кыыл Уола үөскээбит эйгэтэ уонна айымньылаах алтыһыыта» диэн «Возрождение Саха» кинигэ кыһатыгар тахсыбыт кинигэ сүрэхтэниитэ буолла.

РФ үрдүк үөрэхтээһинин Бочуоттаах үлэһитэ, СӨ билимин үтүөлээх диэйэтэлэ, тыл үөрэҕин билимин дуоктара, бэрэпиэссэр, П.А.Ойуунускай аатынан бириэмийэ лауреата, Сунтаар, Дьааҥы улуустарын Бочуоттаах олохтооҕо, олоҥхону уонна олоҥхоһуттары чинчийээччи, үөрэтээччи, үйэтитээччи, тарҕатааччы, фольклорист В.В.Илларионов кыыһынаан дассыан Т.В.Илларионовалыын биир дойдулаахтарын Сергей Афанасьевич Зверев туһунан кини төрөөбүтэ 125 сылын кинигэ бэлэмнээн таһаардылар.

«С.А.Зверев-Кыыл Уолун тылыттан суруллубут айымньылары бэчээттээн таһаарыы Аҕа дойду Улуу сэриитин сылларыттан саҕаламмыттара. Маныаха маҥнайгы суолу биллиилээх суруйааччы, литературнай критик Н.М.Заболоцкай-Чысхаан аспыт эбит. Кини сахаттан бастакы композитор М.Н. Жирковы кытта 1943 сыллаахха фольклорнай экспедицияҕа кэлэ сылдьан, суруйбут айымньыларын “Кыым” хаһыакка уонна “Хотугу сулус” сурунаалга 1943 с. бэчээттэппит эбит. Онтон ыла кини айымньылара периодическай бэчээккэ, хомуурунньуктарга тахсар буолан испиттэр»,- диэн ааптардар киирии тылыгар суруйбуттар.

Кинигэ сүрэхтэниитигэр СӨ бырабыыталыстыбатын бэрэссэдээтэлин солбуйаччы Сергей Местников, Сергей Зверев уола Төгүл Зверев, суруйааччылар уонна ыҥырыылаах ыалдьыттар кыттыыны ыллылар.

Сергей Местников саха норуотун тумус туттар киһитэ Сергей Зверев-Кыыл Уолун туһунан кинигэ үбүлүөйдээх сылыгар тахсыбыта ордук суолталааҕын эттэ.

Уола Төгүл Зверев: «Аҕам туһунан олус элбэх кинигэ баар, ол гынан барыта ахтыылар. Айымньытын булан таһааргаргыт буоллар. Итиэннэ учуонайдар айымньыларын ырытаргыт буоллар. Быйыл биир учуонайы кытта үлэлээтибит» — диэн санаатын тириэртэ.