“Сэргэлээх” ас кэмбинээтэ” ХЭУо тэрээһиннэри ыыта үөрүйэх

“Азия оҕолоро” оонньуулар кэмнэригэр спортсменнары уонна волонтердары аһатыынан  “Сэргэлээх” ас кэмбинээтэ” ХЭУо дьарыктаныа. Оонньуулар кэмнэригэр бэлэмнэммит бүлүүдэ, уу хаачыстыбатын лабораторнай хонтуруола күннэтэ оҥоһулла туруо — Роспотребнадзор 5 тыһыынча боруобаны чинчийэр былааннаах.

«Биһиэхэ 10 эбийиэк бэрилиннэ», — диир дириэктэр Наталья Слепцова.

– Студгородок 4 эбийиэгэ, хас да оскуола остолобуойа. Биһиги өрөспүүбүлүкэ бырабыыталыстыбатын тэрийэр хамыыһыйатын бэрэссэдээтэлэ бигэргэппит комплекснай менютунан үлэлиэхпит.

СӨ Урбаан, эргиэн, туризм министиэристибэтин, Тыа хаһаайыстыбатын министиэристибэтин кытта бородуукталары туруорааччылар бигэргэммиттэрэ. Биһиэхэ Узбекистантан, Азербайджантан, Туркменистантан, Таджикистантан сылдьар элбэх киһилээх хамаандалар кэлиэхтээхтэр, ону кытта Грузияттан, Ирантан, КНДР-тан, Кытай Тайбейыттан сылдьар арыый аҕыйах киһилээх хамаандалары аһатыахпыт. “Сэргэлээх” кэмбинээккэ 400-тэн тахса киһи, манна 6Б №-дээх уопсай дьиэҕэ 100-чэкэ, ону таһынан “Смена” санаторий-профилакторийга аһыахтара. 31 №-дээх оскуола остолобуойугар бэйэбит өрөспүүбүлүкэбит хамаандата аһыа, оттон 5 №-дээх, 7 №-дээх,35 №-дээх оскуолалар, Саха политехническэй оскуола остолобуойдарыгар тастан кэлбит волонтердар аһыахтара. Сарсыарда 7 чаастан киэһэ 22.00 чааска диэри үлэлиибит. Повар көмөлөһөөччүлэринэн, персоналга үрдүк, орто анал үөрэх устудьуоннара үлэлиэхтэрэ”.

Көрөрбүт курдук, сүрүннээн, Киин Азияттан сылдьар хамаандалар, онон менюларыгар шурпа, плов хайаан да киирэр. Сиир эттэрэ халяль Москва нөҥүө кэлэр. Маны таһынан этинэн, балыгынан бэйэбит олохтоох оҥорон таһаарааччыларбыт хааччыйалар. Утахтары “Якутия” ФАПК, бурдук аһы хлебокомбинат спонсордыыллар.