Бүгүн, балаҕан ыйын 25 күнүгэр, өрүү эдэр Сэргэлээххэ Александр Самсоновка-Айыы Уолугар анаммыт искибиэр, стела аһыллыыта буолла.
6 миэтэрэлээх стела 14-с куорпус кэннигэр турбут. Сайыҥҥылыы ылааҥы күн искибиэр иннигэр Айыы Уолун ырыалара дьиэрэйэллэр, дьон-сэргэ тоҕуоруспут.
Алгысчыт, Арассыыйа үтүөлээх артыыһа Дмитрий Артемьев арыылаах алаадьынан, сыалаах саламаатынан аал уотун айах тутан, алҕаата.
Александр ийэтэ Марфа Иннокентьевна Дьокуускай куоракка өйдөбүнньүк мэҥэ таас туруорар баҕа санаа 2017 сылтан үөскээбитэ диэн эттэ. Киин куоракка табыгастаах сири булар уустук. Ол эрээри, анаабыт курдук, эдэр саас уйаламмыт Сэргэлээҕэр, Айыы Уола ыллаабыт-туойбут сиригэр, хатыҥнардаах бүччүм сир көстөн, барыта табыллыбыт. Ол курдук, хас да сыл туруорсан, сүүрэн-көтөн, көҥүл ылан, оҥорторон, дьэ, анаммыт чааһа үүннэ.
Саша 1998 сыллаахха СГУ культурология салаатыгар киирбитэ. Ол эрээри, ыалдьар буолан, ситэ үөрэммэккэ, сырдык тыына быстыбыта. Кини 30-ча ырыаны айан-суруйан хаалларбыта.
Кэрэхсэбиллээҕэ диэн, бу күн күн күбэй ийэтэ Марфа Иннокентьевна төрөөбүт күнэ эбит. Кинини хаҥаластар, Айыы Уолун сүгүрүйээччилэрэ кэлэн эҕэрдэлээтилэр, сибэкки дьөрбөтүн бэлэхтээтилэр.
Култуура, духуобунай сайдыы миниистирэ Афанасий Ноев:
— Бүгүн сайыҥҥылыы сылаас, чаҕылхай күн Айыы Уолун искибиэрэ аһыллар дьоро түгэнэ үүннэ. Бу биһиэхэ барыбытыгар үөрүүлээх, көмүс түгэн. Марфа Иннокентьевнаны ис сүрэхпиттэн эҕэрдэлиибин. Өр сылларга баҕарбыт баҕаҥ туолар өрөгөйдөөх күнэ үүннэ. Дьон-сэргэ, салайааччылар өйөөбүттэрэ элбэҕи этэр. Үп министиэристибэтин олохтоох көҕүлээһиннэри өйүүр бырагырааматыгар иккитэ киирсэн, кыайан, олоххо киирэр кыахтанна. Мин Айыы Уолун кытта алтыспыт дьоллоохпун. Кини ыраас, сырдык санаалаах, дьоҥҥо үтүө-кэрэ суолу хаалларбыт буолан, барыта анаабыт курдук, табылынна. Кини мэҥэ тааһа ыччаты үрдүккэ сирдии турдун, — диэн эттэ.
Стеланы скульптор Степан Лукин чочуйан оҥорбут. Улахан гитара быһыылаах, онно Айыы Уола илиитин уунан турара уонна мичээрдээбит мөрсүөнэ көстөр.
Искибиэри таас билиитэнэн оҥорбуттара, ыскамыайкалары туруорбуттара. Манна номнуо гитаралаах ыччаттар мустан, Айыы Уолун ырыаларын ыллыыллар. Бу дьоро киэһэ өргө диэри искибиэргэ Айыы Уолун ырыалара ылланнылар.
Бүгүн Экология министиэристибэтин үлэһиттэригэр Дьокуускай куорат олохтооҕо Ш.М. Нигматов сибээскэ тахсан, ГРЭС территориятыгар Өлүөнэ өрүскэ …
Бэҕэһээ Үөһээ Бүлүү сэлиэнньэтигэр Саха Өрөспүүбүлүкэтин Судаарыстыбаннаһын күнүгэр анаммыт “Күөх Чэппиэр” өрөспүүбүлүкэтээҕи экологическай аахсыйа чэрчитинэн…
Дьокуускай куорат гражданскай оборуонаҕа, нэһилиэнньэни, сири-уоту көмүскээһиҥҥэ, баһаартан куттала суох буолууга управлениета элбэх оҕолоох уонна…
Хаҥалас оройуонугар быраатын өлөрбүт эр киһи сууттанна. Бу туһунан СӨ Борокуратуурата иһитиннэрдэ. 2025 сыл ыам…
Улуу Кыайыы үбүлүөйдээх сылын чэрчитинэн Кэбээйи нэһилиэгэр үлэ дьонун аатын үйэтитэр эмиэ биир өйдөбүнньүк бэлиэ…
Дьокуускайга "Ас-үөл" тыа хаһаайыстыбатын быыстапка-дьаарбаҥката үһүс күнүн ыытылла турар. Саха сирин тыатын хаһаайыстыбатын тэрилтэлэрин, кэтэх…