Сэрии бэтэрээнэ Алексей Березкин Саха сирин Бочуоттаах олохтооҕо буолла

Ил Дархан ыйааҕынан Аҕа дойду Улуу сэриитин кыттыылааҕа, 101 саастаах Алексей Николаевич Березкиҥҥа “Саха Өрөспүүбүлүкэтин Бочуоттаах олохтооҕо” үрдүк ааты иҥэрдилэр.  

Алексей Николаевич доруобуйатын туругунан өрөспүүбүлүкэ Бочуоттаах олохтооҕо бэлиэни уонна дастабырыанньаны, ону тэҥэ, “1941-1945 сс. Аҕа дойду Улуу сэриитигэр кыайыы” мэтээли сиэнэ Нарыйа Иванова ылла.

Киниэхэ наҕарааданы Бырабыыталыстыба бэрэссэдэтэлин солбуйааччы Георгий Степанов туттарда.

“Саха Өрөспүүбүлүкэтин Бочуоттаах олохтооҕо” дастабырыанньаны уонна бэлиэни, ону тэҥэ, дойду Бэрэсидьиэнэ Владимир Владимирович Путин бигэргэппит “Аҕа дойду сэриитигэр кыайыы 80 сыла” мэтээли эһэҕэр туттарабын. Алексей Николаевичка Кыайыы 80 сылынан уонна үрдүк наҕарааданан мин истиҥ эҕэрдэбин тириэрт”, – диэн Георгий Степанов эттэ.

Нарыйа Иванова сэрии бэтэрээннэригэр өрүү уурар болҕомтолорун уонна кыһамньыларын иһин өрөспүүбүлүкэ салалтатыгар махталын биллэрдэ.

Алексей Николаевич Березкин – үлэ уонна успуорт бэтэрээнэ, Мэҥэ Хаҥалас улууһун Бочуоттаах олохтооҕо. Кини 1923 сыллаахха Мэҥэ Хаҥалас улууһугар Дьабыылга төрөөбүтэ. Кыһыл Аармыйа кэккэтигэр Чурапчы оройуонунааҕы холбоһуктаах байыаннай комиссариат ыҥырыытынан барбыта.  Японияны утары сэриигэ Сунгарийскай хайысханан разведчик быһыытынан 368-с ураты горнострелковай пуолкаҕа 2-с Уһук Илиҥҥи фронт састаабыгар кыттыбыта. 1946 сыл атырдьах ыйыттан 1947 сыл кулун тутарыгар диэри 90-с артиллерийскай батальоҥҥа старшай пулеметчигынан сулууспалаабыта. Алексей Николаевич 1947 сыл кулун тутарыгар демобилизацияламмыта. Байыас “Германияны кыайыы иһин”, “Японияны кыайыы иһин” мэтээллэринэн, Аҕа дойду сэриитин II истиэпэннээх уордьанынан уонна Үрдүкү сүрүн хамаандалааччыттан махтал суругунан бэлиэтэммитэ.

Сэрии кэнниттэн Алексей Николаевич төрөөбүт нэһилиэгэр холкуоска оробуочайынан, Дьабыыл орто оскуолатыгар учууталынан, Төҥүлү оскуолатыгар суоппарынан, Дьабыыллааҕы оҕо дьиэтигэр пионер баһаатайынан үлэлээбитэ.

Алексей Николаевич олоҕор успуорт ураты миэстэни ылара, чуолаан чэпчэки атлетика. Тугунан да дьарыктаммытын иһин, эрчиллиитин хаһан даҕаны тохтоппотоҕо. 1943 сылтан 1987 сыллаахха диэри успуордунан дьарыктаммыта уонна сэлиэнньэтигэр, улууска, өрөспүүбүлүкэҕэ успуорду тарҕатааччылартан биир саамай көхтөөхтөрө этэ.

Алексей Николаевич тапталлаах кэргэнин Варвара Егоровна Громованы кытта 64 сыл бииргэ олорбуттара, түөрт оҕону улаатыннарбыттара. Бүгүн кинилэр дьыалаларын уон биир сиэннэрэ, уон алта хос сиэннэрэ уонна икки хос-хос сиэннэрэ салгыыллар.

Ил Дархан уонна Бырабыыталыстыба пресс-сулууспата.