Сэрии бэтэрээнэ Мартын Григорьев — Сунтаар улууһун бочуоттаах олохтооҕо

Мартын Герасимович Сунтаар улууһун Кутана нэһилиэгиттэн төрүттээх. Кини билигин Дьокуускай куоракка бэрт сэргэхтик олорор, быйыл 100 сааһын томточчу туолуоҕа.

Забайкальскай уокурукка 1943 сыллаахха ыҥырыллан, сулууспатын Манчжурия Илиҥҥи кыраныыссатыттан саҕалаабыта. Онтон Милитаристскай Японияны кытта тиһэх кыргыһыыга кыттыбыта. Бу кэмҥэ зенитнэй артиллериһынан, биэс киһилээх зенитнэй отделение командирынан сулууспалаабыта. Дойдутугар старшай сержант званиелаах 1951 сыллаахха төннүбүтэ.

Саха хорсун саллаата «Аҕа Дойду сэриитин II-c истиэпэннээх» уордьанынан, «Японияны Кыайыы иһин» мэтээлинэн, «Аҕа дойдуну көмүскээччи» бэлиэнэн, Г.К. Жуков мэтээлинэн уонна үбүлүөйдээх мэтээллэринэн наҕараадаламмыта.

Дьоруойдуу дойдутун көмүскээбит Ытык кырдьаҕаска Сунтаар улууһун баһылыга Анатолий Григорьев «Сунтаар улууһун бочуоттаах олохтооҕо» бэлиэни туттарда.