Сэрии бэтэрээнэ Наум Слепцов 101 сааһын туолла

Бүгүн, кулун тутар 8 күнүгэр, сэрии бэтэрээнэ Наум Слепцов 101 сааһын туолла. Кини уһун олоҕо бэрт интэриэһинэй.

Наум Трифонович Слепцов Таатта улууһун Чөркөөх нэһилиэгэр 1924 сыл кулун тутар 8 күнүгэр төрөөбүтэ. Кини 1945 сыллаахха Кыһыл Аармыйаҕа ыҥырыллан, милитаристскай Японияны үлтү сынньыыга кыттыбыта. Бу иннинэ кини убайа Василий фроҥҥа сылдьар буолан, сэриигэ барарыгар аккаастаабыттара.

Хайлар диэн кириэппэс-куораты ыларга кырыктаах кыргыһыылар буолбуттара. Бу үөһээ хайаҕа турар, бөҕөргөтүллүбүт, бетон траншеялардаах, бөҕө дроттардаах кириэппэс этэ. Штурм кэмигэр Наум Трифонович иккитэ дьоппуоннар атаакаларын тохтоппута, онон «Бастыҥ пулеметчик» бэлиэнэн наҕараадаламмыта.

Байыас 1950 сыллаахха эрэ дойдутугар кэлбитэ. Сэрии кэнниттэн Аллайаыха, Горнай, Чурапчы, Томпо, Таатта улуустарыгар учууталынан үлэлээбитэ. Кириэс-Халдьаайы уонна Бэрдьигэстээх орто оскуолаларыгар дириэктэрдээбитэ.

Наум Трифонович – алта оҕолоох, 13 сиэннээх, 8 хос сиэннээх улахан дьиэ кэргэн аҕа баһылыга.

Аҕа дойдуну көмүскээччи күнүн көрсө Ил Дархан Айсен Николаев сэрии бэтэрээннэригэр «Саха Өрөспүүбүлүкэтин Бочуоттаах олохтооҕо» үрдүк ааты иҥэрбитэ.  Наум Трифонович Слепцовка — Горнай, Томпо, Таатта улуустарын Бочуоттаах олохтооҕор, эмиэ бу үрдүк аат иҥэриллибитэ.

Наум Трифонович кэргэнин кытта Сэбиэскэй Сойуус Дьоруойа Федор Охлопков кэриэһин үйэтитэргэ улахан кылааттарын киллэрбиттэрэ. Аатырбыт снайпер олоҕун туһунан архыыптан элбэх матырыйааллары булбуттара, хас да кинигэни таһаартарбыттара, быыстапкалары тэрийбиттэрэ. Ф.М. Охлопков аатынан түмэл аһыллан, кэлин кыраайы үөрэтэр түмэлгэ кубулуйбута.

Наум Слепцов – РСФСР спордун бэтэрээнэ. Кини спорт алта көрүҥэр — саахымакка, дуобакка, хайыһарга, ыарахан атлетикаҕа, остуол тенниһигэр, буулдьанан ытыыга бастакы разрядтаах. 96 сааһыгар саахымакка спорт маастарыгар хандьыдаат буолбута. Наум Трифонович саахымат турнирдарын тэрийэр, онно бэйэтэ бириис туруорар идэлээх.

СӨ Бочуоттаах олохтооҕо Наум Слепцов бойобуой үтүөлэрин иһин «Аҕа дойду сэриитин» II истиэпэннээх уордьанынан наҕараададламмыта.