Сэрии бэтэрээннэригэр 2-лии мөлүйүөн солкуобай төлөннө

Тохсунньу 14 күнүгэр Кыайыы 80 сылын көрсө, Аҕа дойду Улуу сэриитин кыттыылаахтарыгар биирдэ бэриллэр төлөбүрдэр төлөннүлэр диэн Үлэ, социальнай сайдыы министиэристибэтэ иһитиннэрэр. 

— Кыайыы үбүлүөйүн дьоһуннук көрсүү бүгүн биһиэхэ инники күөҥҥэ тутуллар сыал-сорук буолар. Ил Дархан Айсен Николаев сорудаҕынан, үбүлүөйдээх сыл бастакы үлэ күннэригэр сэрии бэтэрээннэригэр төлөбүрдэр төлөннүлэр. Ол курдук,  Аҕа дойду сэриитин бэтэрээнигэр төлөбүр суумата 2 мөлүйүөн солкуобайга тэҥнэстэ, — диэн миниистир Елена Волкова бэлиэтээтэ.

Маны тэҥэ, Улуу Кыайыы 80 сылынан, Ил Дархан ыйааҕынан, биирдэ бэриллэр төлөбүрдэр олохтоннулар:

Ленинград блокадатын кыттыылааҕар, концлааҕырга оҕо сылдьан түбэспит дьоҥҥо, сэрии огдооболоругар — 80 тыһыынча солкуобай,

тыыл бэтэрээннэригэр — 50 тыһыынча солкуобай,

сэрии оҕолоругар (3.09.1927 — 31.12.1945 с.т.) — 5 тыһыынча солкуобай.

Бу төлөбүрдэргэ сайабылыанньа суруйар ирдэммэт, олунньу 20 күнүгэр диэри төлөнүөхтэрэ.

Бүгүҥҥү күҥҥэ Саха сиригэр олороллор:

9 сэрии бэтэрээнэ, 1506 тыыл бэтэрээнэ, сэрии огдообото — 208, Ленинград блокадатын кыттыылааҕа — 11, концлааҕыр хаайыылааҕа — 5, сэрии оҕолоро — 12 725 киһи.