“Сэрии саҕана уончалаах оҕо этим”

Кыайыы тыылга үлэлиир дьон көмөтө суох кыаллыбат.

Аҕа дойдуну көмүскээччи күнэ буолуон иннинэ Ил Дархан Аҕа дойду Улуу сэриитин кэмигэр бэйэлэрин харыстаммат үлэлэринэн кыайыыны уһансыбыт 11 сэрии, тыыл бэтэрээннэригэр, блокадаҕа түбэспит Ленинград олохтоохторугар махтанан туран, РФ Бэрэсидьиэнин аатыттан “1941-1945 сс. Аҕа дойду сэриитин Кыайыы 80 сыла” үбүлүөйдээх мэтээллэри туттарда.

Хаҥалас улууһун Тиит Арыы нэһилиэгиттэн төрүттээх Надежда Митрофановна Мордвинова сэрии саҕана уончалаах оҕо этэ.

“Ийэбинээн холкуоска үлэлиирбит, бурдук үүннэрэбит, хортуоска олордорбут. Кэлин Дьокуускайга интэринээккэ ас астааччынан үлэлээбитим. Былырыын 90 сааспын туолбутум, икки кыыстаахпын. Бэйэбин көрүнэн соҕотоҕун олоробун. Миигин умнубаттар, бу курдук ыҥыран куруук  эҕэрдэлииллэр”, — диэн Надежда Митрофановна бүгүҥҥү тэрээһини олус астыммытын этэр.