Салгыы
Сэрии сылларын оҕолоругар соһуччу үөрүүнү бэлэхтээтилэр

Сэрии сылларын оҕолоругар соһуччу үөрүүнү бэлэхтээтилэр

13.06.2024, 20:00
Хаартыска: Иван Николаев.
Бөлөххө киир:

Быйылгы халаан уута Нам улууһун Хатырык, Маймаҕа, Модут, Арбын, Граф биэрэгэ,  2 Хомустаах  нэһилиэктэригэр улахан хоромньуну оҥорбутун бары соһуйа-долгуйа истибиппит.

Билигин  Эҥсиэли хочотун нэһилиэктэрэ халаан уутуттан тахсыбыт ночоотторун ааҕынар, олорор дьиэлэрин, хотоннорун, ампаардарын ыраастыыр, куурдар, уу аҕалбыт бөҕүн-сыыһын  ыраастыыр, хортуоппуй олордор түбүккэ олороллор. Кырдьык, ханна да тиий,  хоромньуну оһорунар күннээҕи түбүк, үлэ-хамнас дьон олоҕо оннугар түһэн эрэрин туоһулуур. Кинилэргэ билэр-билбэт дьонноро, тэрилтэлэр, улуустар быыстала суох көмөлөһөр буоланнар, бу ыарахан кэмҥэ соҕотох  буолбатахтарыттан санаалара бөҕөх, барыта этэҥҥэ  буоларыгар эрэллээхтэр.

Дьокуускай куоракка олорор “Нам” түмсүү чилиэттэрэ (сал. Гаврил Слепцов) биир дойдулаахтарыгар көмөлөһөр сыалтан  уочараттаах аахсыйаны тэрийдилэр.

Бэс ыйын 10 күнүгэр Атамай учаастагар олорор  ытык кырдьаҕас Иннокентий  Афанасьевич Винокуров дьиэ кэргэнигэр соһуччу үөрүү тосхойдо. Ол курдук, СӨ Ытык кырдьаҕастарын үрдүкү сүбэтин бэрэссэдээтэлэ Люлия Григорьева Хатырык ытык кырдьаҕаһын дьиэтигэр киирэн кэллэ. Иһит сууйа турбут кырдьаҕас соһуйан мух-мах барда. Хаһааҥҥыттан эрэ билсэр киһилии, Люлия Николаевна дорооболоһон, бэйэтин билиһиннэрэн баран, кэлбит соругун эттэ. Өрөспүүбүлүкэ   Ытык кырдьаҕастарын үрдүкү  сүбэтин чилиэттэрэ тыыл-үлэ  бэтэрээнэ Иннокентий Афанасьевич дьиэ кэргэнигэр 94 тыһыынча солкуобайы хомуйбуттарын, уу харчынан  ботуччу туттарда.  Дьиэлээхтэр соһуйдулар, үөрдүлэр, муҥура суох махталларын биллэрдилэр. Дьиэлээх хаһаайын 96 саастаах эбит,  ынах, сылгы сүөһүлээх. Кэргэнинээн 73 сыл бэрт эйэлээхтик олорбуттар, 11 оҕону төрөтөн үлэһит  оҥортообуттар,  Хатырыкка олороллор эбит.  Уолаттар олбуор иһигэр оттуур тиэхиньикэлэрин  өрөмүөннэнэ сылдьаллар. “Улахан уолум 73 саастаах, кырам 53 саастаах, өссө да кэргэн ыла илик “- диэн  дьиэлээх хаһаайын  кэпсээн соһутта. Улахан дьиэ кэргэн оҕолоро төрөппүттэрин таһыгар биир нэһилиэккэ олороллор, үлэлииллэр эбит.

Ити күн куоракка олорор биир дойдулаахтарбыт – Гаврил Местников салайааччылаах “Нам” түмсүү бөлөҕө тахсан, “Сэрии сылларын оҕолоро” хамсааһын Дьокуускай куораттааҕы чилиэттэрэ (бэрэссэдээтэл З.Д. Винокурова) хомуйбут үптэрин сэрии сылларын оҕолоругар, билигин 80 саастарын лаппа ааспыт тыыл уонна үлэ бэтэрээннэригэр — чопчу оҕо дьиэтин иитиллээччилэригэр Николаева Клара Афанасьевнаҕа (Партизан), дьоруой ийэҕэ Шапошникова Анастасия Ивановнаҕа (Модут), Чурапчы көһөрүүтүн кыттыылааҕар Соловьев Николай  Дмитриевичка (Граф биэрэгэ), Модукка олорор сэрии сылларын оҕотугар Кутуков Игнат Ивановичка, Хатырыкка олорор сэрии сылларын оҕолоругар Собакина Мария Даниловнаҕа, Лукинов Иван Николаевичка, Парникова Евдокия Архиповнаҕа, уопсайа 7 ыалга уу харчынан көмөнү тиэртилэр. Бырабылыанньа чилиэнэ  Мария Габышева, сэрии сылларын оҕолоро оччолорго интэринээттэр, оҕо дьиэлэрэ баар буоланнар тыыннаах ордубуттарын, улаатан баран норуот хаһаайыстыбатын чөлүгэр түһэриигэ бэриниилээхтик үлэлээбиттэрин санатта. Харчынан көмөнү туттарарыгар кини: “Сэрии сылларын оҕолоро билигин сааһыран, кыаммат буолан иһэбит, болҕомтоҕо, көмөҕө наадыйабыт. Ыарахан кэмҥэ түмсүүлээх буоллахпытына эрэ бу айылҕа алдьатыытын туоратар кыахтаахпыт” — диэтэ.

Ити курдук  халаан уутуттан эмсэҕэлээбит дьону кытта көрсөн, кэпсэтиһэн, санаа атастаһан кэллибит. Улуус баһылыга Юрий Слепцовы кытта ханнык хайысханан бииргэ үлэлиирбитин быһаарыстыбыт. Баһылык эмсэҕэлээбиттэргэ көмө өрөспүүбүлүкэ араас муннугуттан, уопсастыбаннай тэрилтэлэриттэн, биирдиилээн  дьонтон  күннэтэ оҥоһулла турарын, иэдээҥҥэ соҕотох буолбатахпытын илэ харахпытынан көрдүбүт, биллибит, үөрэбит, махтанабыт диэтэ. Уу содулуттан босхолоноллоругар олохтоохтор бар дьонноругар, салалтаҕа махталлара муҥура суоҕун, санаалара бөҕөтүн, эрэллээҕин кэпсээтэ. Чахчы да  норуот күүһэ — көмүөл күүһэ диэн манныгы этэн эрдэхтэрэ.

“Нам” түмсүү.

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
16 июля
  • 23°C
  • Ощущается: 23°Влажность: 64% Скорость ветра: 4 м/с

Сообщить об опечатке

Текст, который будет отправлен нашим редакторам: