Сэтинньигэ суоппардары туох уларыйыы күүтэрий?

Сэтинньигэ ОСАГО полиһа баарын видеоҕа түһэрэн бэлиэтиир систиэмэ киириитэ, тырааныспар нолуогун суукка тиэрдибэккэ тутан ылыы уонна утилизационнай хомуур үрдээһинэ күүтүллэр. Ону таһынан, саҥа массыыналар сыаната үрдүүрэ уонна сокуоннайа суох сууйар убаҕастары утары охсуһуу саҕаланара сабаҕаланар.

Тырааныспар нолуога

Сэтинньи 1 күнүттэн Федеральнай нолуок сулууспата (ФНС) физическэй сирэйдэртэн уонна бэйэ дьарыктаахтартан нолуок иэстэрин суукка тиэрдибэккэ ирдиир буолуоҕа. Бу саҥа уларыйыы, бастатан туран, тырааныспар нолуогун кэмигэр төлөөбөтөх Арассыыйа олохтоохторун таарыйыаҕа. Бу ФНС үлэтэ уларыйыытын туһунан этиллэр: сэтинньи саҕаланыытыгар иэстээх, ол иэһэ билигин суута суох тутуллар буолбут физическэй сирэйдэргэ анал иһитиннэрии ыытыллыаҕа. Иэстээхтэргэ ирдэбили сөбүлэспэттэрин биллэрэллэригэр 30 хонук бэриллиэҕэ.

ОСАГО суоҕун иһин ыстараап

Буф сыл ыам ыйыгар РФ Бэрэсидьиэнэ Владимир Путин бырабыыталыстыбаҕа уонна Киин бааҥҥа ОСАГО-та суох суоппардары утары охсуһууну күүһүрдэргэ, сэтинньи 1 күнүгэр диэри тустаах миэрэлэри ылалларыгар сорудахтаабыта. Полиһа суох дьону хаартыскаҕа-видеоҕа түһэрэр камералар көмөлөрүнэн автоматическай эрэсиимҥэ «тутары» былаанныыллар: систиэмэ баазаттан страховка дуогабарын булбатаҕына, массыына бас билээччитигэр ыстараап кэлиэҕэ. Билиҥҥи туругунан, бу көҕүлээһини этиллибит болдьоххо олоххо киллэрэр кыаллыа дуу, суох дуу — биллибэт, тоҕо диэтэххэ камера нөҥүө ОСАГО баарын бэрэбиэркэлиир эспэримиэн саҕаланыыта көһөрүллэн иһэр. Билигин ГИБДД инспектордара ОСАГО полиһын утарынан бэрэбиэркэлииллэр: полис суоҕун иһин ыстараап 800 солкуобайга тэҥнэһэр, оттон хос кэһии иһин суоппар 3-5 тыһыынча солкуобайы төлүөхтээх.

Утилизационнай хомуур үрдээһинэ

Сэтинньи 1 күнүттэн омук массыыналарыгар утилизационнай хомууру ааҕар методика уларыйыахтаах, тустаах бырабыыталыстыба уурааҕын Бырамыысыланнас уонна атыы-эргиэн министиэристибэтэ бэлэмнээтэ. Бу кыраныысса таһыттан киллэриллэр, мотуордарын кыаҕа 160 ат күүһүттэн үрдүк массыыналар тустарынан этиллэр. Саҥа уларыйыылар тимир көлө сыанатын үрдэтиэхтээх. Ону таһынан, бырабыыталыстыба утилизационнай хомууру ааҕар ньыманы хат көрүөҕэ.

Саҥа массыыналар сыаната үрдүөҕэ

Сэтинньигэ саҥа массыыналар сыаната ирдэбили өйүүр бырагыраамалар уонна массыына оҥорооччулар чэпчэтиилэрэ тохтотулларыттан сылтаан үрдүөхтэрэ, диэн «Газета.Ru» «Рольф» хампаанньа саҥа массыыналары атыылыыр департаменын дириэктэрэ Николай Иванов эттэ.

Кини сабаҕалыырынан, сыана тырааныспар билиҥҥи сыанатыттан 3-5% үрдүөҕэ.

Сокуоннайа суох сууйар убаҕаһы утары охсуһуу

Сэтинньи 1 күнүттэн «Метанол уонна метаноллаах убаҕастар эргиирдэрин судаарыстыбанан дьаһайыы туһунан» федеральнай сокуон (108-ФЗ) 4-с ыстатыйатын 1 уонна 2 чаастарын балаһыанньалара күүстэригэр киирэллэр. Билиҥҥиттэн метанол эргиирин анал реестиргэ киирбит информациялаах тэрилтэлэр уонна биирдиилээн урбаанньыттар эрэ толоруохтарын сөп.