Сэтинньи бүтүөр диэри нолуоктары төлүөххэ наадатын санаттылар

Арассыыйа олохтоохторугар сорох нолуок көрүҥнэрин төлүүргэ биир нэдиэлэ хаалла. Ол курдук, нолуок консультаана уонна Нолуок консультааннарын балаататын научнай-эспиэрдиир сэбиэтин чилиэнэ Оксана Мучараева, сир учаастактарын, хамсаабат баай-дуол эбийиэктэрин уонна көлө бас билээччилэрэ 2024 сыллааҕы баай-дуол нолуоктарын ахсынньы 1 күнүгэр диэри төлүөхтээхтэрин санатта.

Эспиэр бэлиэтииринэн, ааспыт сыл иһин нолуоктары төлүүргэ нолуок декларациятын туттарыы ирдэммэт — нолуок иниспиэксийэтэ бэйэтэ сууманы ааҕан баран иһитиннэриини ыытыаҕа. Судаарыстыба гражданнартан хамсаабат баайы-дуолу бас билэр бырааптарын иһин сыл аайы нолуок хомуйар. Нолуок ааҕыллара Росреестрга хамсаабат баай-дуол эбийиэктэрэ регистрацияламмыт күннэриттэн саҕаланар. Өскөтүн эбийиэк өлүүлээн бас билиллэр буоллаҕына, нолуок кээмэйэ бас билии өлүүтүттэн көрөн быһаарыллыаҕа. Киһи бас билэр хамсаабат баай-дуол эбийиэктэриттэн олорботоҕун да иһин, нолуогу төлүүр эбээһинэс хаалар.

Нолуок суумаатын ааҕыыны нолуок уорганнара оҥороллор. Отчуоттуур кэм бүттэҕинэ, нолуок иниспиэксийэтэ ааҕыллыбыт суума туһунан иһитиннэриини Федеральнай нолуок сулууспатын саайтыгар тус кабинекка уонна бас билээччи регистрацияламмыт аадырыһыгар суругунан ыытыаҕа.

Нолуокка тардыллар хамсаабат баай-дуол эбийиэктэригэр киирэллэр:

• олорор дьиэлэр;
• кыбартыыралар;
• хостор;
• ыскылааттар уонна тэхиниичэскэй хостор;
• гараастар уонна массыына турар сирдэрэ;
• араарыллыбат тутуулар уонна тэриллэр комплекстара (холобур, собуоттар эбэтэр тимир суоллар);
• сиппэтэх тутуу эбийиэктэрэ.

Нолуок ыстаапкалара эбийиэк көрүҥүттэн тутулуктаахтар: 

• олорор дьиэлэргэ, гараастарга уонна массыына турар сирдэригэр — кадастровай сыанатыттан 0,1%;
• офис дьиэлэригэр, эргиэн кииннэригэр баар хосторго уонна 300 мөлүйүөн солкуобайтан үөһэ сыаналаах хамсаабат баайга-дуолга — 2%;
• атын эбийиэктэргэ — 0,5%.

Нолуок иһитиннэриитигэр нолуок суумата уонна бары наадалаах ааҕыы дааннайдара, ол иһигэр эбийиэк кадастровай сыаната, ыйыллар. РФ Нолуок кодексатын 406-с ыстатыйатын 3-с пуунун быһыытынан, олохтоох салайыныы уорганнара уонна федеральнай суолталаах куораттар былаастара ыстаапкалары нуулга диэри намтатар, эбэтэр үс төгүлтэн ордуга суох үрдэтэр бырааптаахтар. Ону таһынан, нолуок 2023 сыллаахха быһаарыллыбыт саҥа кадастровай сыанаҕа олоҕуран ааҕылларын бэлиэтиир тоҕоостоох. 2024 сыл иһин нолуогу ааҕарга бу сыана туттуллар.