Сэтинньи: ханнык сокуоннар олоххо киирэллэрий?

Cэтинньигэ  нэһилиэстибинньиктэри, ону тэҥэ төлөпүөн нүөмэрдэрин уларытары сөбүлүүр дьону таарыйар сокуоннарга суолталаах уларыйыылар киириэхтэрэ.

Сорохторго биэнсийэ үрдүүр

Сэтинньиттэн Социальнай пуонда сорох биэнсийэни ылааччыларга былааннаммыт хос ааҕыыны (перерасчет) ыытыа. Индексация автоматическай эрэсиимнэн барыа. Ол курдук, 80 саастарын туолбут биэнсийэлээхтэргэ страховой биэнсийэҕэ олохтоммут төлөбүр икки төгүл улаатар – 8907,7 солкуобайтан 17 815,4 солкуобайга диэри. Эбиитин кинилэргэ көрүү-харайыы иһин эбии төлөбүр – 1314 солкуобай оннунан хаалар, өскөтүн онно наадыйар буоллахтарына.

Нолуокка саҥа бэрээдэк киллэриллэр

Сэтинньи 1 күнүттэн урбаанньыт буолбатах дьоҥҥо нолуокка иэстэри учуоттуур уонна төлүүр саҥа бэрээдэк күүһүгэр киирэр. Аны нолуок иэһэ нолуок суумматын кытта сөбүлэһэриттэн-сөбүлэспэтиттэн тутулуктанан, суут бэрээдэгинэн да, сууту таһынан да ирдэнэр буолуо.

Брокердарга саҥа эбээһинэстэр олохтоноллор

Сэтинньи 5 күнүттэн брокердар килийиэннэри кытта алтыһыыларын быраабылаларын саҥардыахтаахтар. Бу күнтэн үп-харчы ырыынагар брокердары түмэр бэйэни салайынар тэрилтэ (СРО) чилиэннэрэ оҥорор үп-харчы өҥөтүн ылааччыларын бырааптарын уонна интэриэстэрин көмүскүүр баазовай стандартын сүрүн балаһыанньалара күүстэригэр киирэллэр. Ол иһигэр брокердар килийиэннэргэ операциялар буолуон сөптөөх кутталларын (риск) туһунан эрдэттэн кэпсиэхтээхтэр.

Нэһилиэстибинньиктэргэ өлбүт киһи иэстэрин туһунан кэпсиэхтэрэ

Сэтинньи 24 күнүттэн нотариустар нэһилиэстибэ хаалларааччы кирэдьиит историятын бюротугар иэһэ баарын-суоҕун бэрэбиэркэлиир кыахтаныахтара. Ону тэҥэ нотариустар нэһилиэстибэҕэ бырааптарын туһунан сайабылыанньа биэрбит дьоҥҥо нэһилиэстибэ хаалларааччы иэһэ баарын-суоҕун туһунан этиэхтээхтэр. Нотариус өлбүт киһи иэстэрин туһунан информацияны нэһилиэстибинньиктэргэ олорор аадырыстарынан суругунан, эбэтэр электроннай буостанан, эбэтэр тус көрсүһүүгэ билиһиннэриэхтээх.

Сүүрбэттэн тахса SIM-каартаны оҥотторуу бобуллар

Сэтинньи 1 күнүттэн Арассыыйа олохтоохторо бэйэлэригэр сүүрбэттэн элбэх SIM-каартаны оҥотторор кыахтара суох буолуо. Оператордарга, өскөтүн бас билээччи дааннайдара бигэргэтиллибэтэх буоллахтарына, эбэтэр биир киһиэхэ оҥотторбут SIM-каарталарын ахсаана бэрэбиэркэлэммэтэх буоллаҕына, нүөмэрдэри өҥөнөн хааччыйыы бобуллуо. Бу дьаһаллар анонимнай нүөмэрдэри уонна төлөпүөнүнэн түөкүннээһини утары охсуһууга туһуланаллар.

Кутталлаах метанол эргиирин хонтуруоллуур буолуохтара

Сэтинньи 1 күнүттэн метанол уонна метаноллаах убаҕастар эргиирин судаарыстыбаннай реестиргэ киирбит тэрилтэлэр уонна урбаанньыттар эрэ ыытар кыахтаныахтара. Реестиргэ киирбэтэхтэргэ метанол эргиирэ бобуллуо.