Сэтинньи көрдөрүүтүнэн «Саха сирэ» саайты мөлүйүөнтэн тахсата көрдүлэр

«Саха сирэ» хаһыат саайтыгар тахсар сонуннары дьон-сэргэ кэтэһэр, ыйыталаһар. Маныаха ый ахсын ааҕыы хайдаҕа, тугу ордук сэргииллэрэ, сэҥээрэллэрэ көрүллэр. Сэтинньи көрдөрүүтүнэн «Саха сирэ» саайты ааҕааччы биллэ элбээбитэ бэлиэтэнэр.  

Анивера Акимова, “Саха сирэ” хаһыат кылаабынай эрэдээктэрин солбуйааччы:

— Икки сыллааҕыта, балаҕан ыйын 27 күнүгэр, Судаарыстыбаннас күнүгэр sakha-sire.ru диэн саҥа саайты үлэлэтэн саҕалаабыппыт. Саайт кэрэспэдьиэннэрэ күннээҕи сонуннары таһынан интервьюлары, сүбэлэри-амалары, ыйытыыларга хоруйдары, интэриэһинэй хаартыскалары, видеолары, ааҕааччыларбыт суруктарын тиһигин быспакка таһаараллар.

Сэтинньи ыйдааҕы көрдөрүүнэн, «Саха сирэ» саайты мөлүйүөнтэн тахсата көрдүлэр. Онон, сахалыы тылынан дьон сонуннары ааҕара элбээн иһэрэ, саайтпытын интэриэһиргииллэрин туоһулуур. Ааҕааччыларбытыгар биһигини кытта бииргэ буолалларыгар махтанабыт. Өссө да сэргэх, сонун матырыйааллары таһаарарга дьулуһуохпут диэн эрэннэрэбит.

Күн бүгүн өрөспүүбүлүкэтээҕи «Саха сирэ» хаһыат эрэдээксийэтэ икки саайты — sakha-sire.ru уонна edersaas.ru саайтары үлэлэтэр.