Сэтинньигэ биэнсийэ төлөбүрэ эрдэ түһүөҕэ

Сэтинньигэ биэнсийэни төлүүр кыраапык Норуот сомоҕолоһуутун күнүгэр анаммыт бырааһынньыктарынан сибээстээн уларытыллыаҕа. Ый саҕаланыытыгар кэлиэхтээх төлөбүрдэр сэтинньи 1 күнүгэр түһүөхтэрэ, — диэн РИА Новости Госдуума дьокутаата Алексей Говырин иһитиннэрдэ.

«Бу сыл сэтинньитигэр биэнсийэ төлөбүрүн кыраапыга Норуот сомоҕолоһуутун күнүгэр анаммыт бырааһынньык күннэринэн сибээстээн уларытыллыаҕа. Сэтинньи 2, 3 уонна 4 күннэрэ официальнайдык өрөбүлүнэн биллэриллибиттэринэн, РФ Социальнай пуондата биэнсийэлээхтэр харчыларын хойутаппакка ылалларын туһугар, төлөбүр күннэрин эрдэттэн көһөрөр. Өскөтүн биэнсийэни тиэрдэр бигэргэтиллибит күн өрөбүлгэ эбэтэр бырааһынньыкка түбэһэр буоллаҕына, харчы эрдэ түһэр — уһун өрөбүллэр иннинээҕи бүтэһик үлэ күнүгэр.

Быйыл ол аата, ый саҕаланыытыгар кэлиэхтээх төлөбүрдэр сэтинньи 1 күнүгэр киириэхтэрэ», — диэтэ Говырин. Дьокутаат бэлиэтээбитинэн, бу быраабыла баан нөҥүө биэнсийэ ылааччыларга да, харчыларын дьиэлэригэр аҕалан биэрэллэригэр эбэтэр буоста салаатын нөҥүө ылааччыларга да сыһыаннаах.

«Буоста салааларыгар тиэрдии күннэрэ хас биирдии эрэгийиэҥҥэ үлэлэрин эрэсиимин учуоттаан уларытыллаллар, ол эрэн эрдэ көһөрүү быраабылата уларыйбат. Баан счеттарыгар төлөбүрдэр эрдэ киирэллэр — алтынньы 31 күнүттэн хойутаабакка. Харчы киирэр чуолкай күнүн Социальнай пуонда саайтарыгар тус кабинекка эбэтэр баан мобильнай сыһыарыытыгар киирэн бэрэбиэркэлиэххэ сөп. Төлөбүр кыраапыгын көһөрүү сыл аайы бигэргэтиллибит өрөбүл халандаарынан ыытыллар, ол туһугар биэнсийэлээхтэр харчыларын бырааһынньык күннэриттэн тутулуга суох, кэмигэр ылаллар», — диэн кини  бэлиэтээтэ.