Сэтинньигэ оҕо босуобуйаларын уонна биэнсийэ төлөбүрдэрин болдьоҕо сыҕарыйыа

2025 сыл сэтинньитигэр бырааһынньык күннэринэн сибээстээн, оҕо босуобуйаларын уонна биэнсийэ төлөбүрдэрин болдьоҕо сыҕарыйыа, диэн «Известия» иһитиннэрэр. Онон сибээстээн, төрөппүттэр уонна биэнсийэлээхтэр харчыларын кэмигэр ылалларын наадатыгар, төлөбүр күннэригэр болҕомтолорун ууруохтаахтар.

2025 сыл сэтинньитигэр  социальнай төлөбүрдэргэ улахан уларыйыылар киириэхтэрэ. Норуот сомоҕолоһуутун күнэ бырааһынньыгынан уонна өрөбүл күннэр көһөрүллүүлэринэн сибээстээн, сорох босуобуйалар эрдэ төлөнүөхтэрэ, оттон сорох биэнсийэлээхтэр биэнсийэлэрин кээмэйэ биллэрдик үрдүөҕэ.

Өрөбүллэри көһөрүү маннык: сэтинньи 1 күнэ — үлэ күнэ, оттон 3 күнэ — өрөбүл, онон гражданнар бырааһынньыктарга бэлэмнэнэллэрин курдук, социальнай төлөбүрдэр болдьохторун иннинэ, сэтинньи 1 күнүгэр түһүөхтэрэ.

Оҕо босуобуйата үксүн ый ахсын 10-с чыыһылатыгар диэри төлөнөр, ол эрээри сэтинньигэ харчы эрдэ кэлиэҕэ. Сэтинньи 1 күнүгэр маннык төлөбүрдэр болдьохторун иннинэ түһүөхтэрэ: биир кэлим босуобуйа, үс сааһыгар диэри бастакы оҕоҕо төлөбүр, үлэлээбэт дьоҥҥо 1,5 сааһыгар диэри оҕону көрүүгэ босуобуйа, байыаннай сулууспалаах оҕотугар үс сааһыгар диэри төлөнөр босуобуйа уонна хат дьахталларга биир кэлим босуобуйа. Бу төлөбүрдэр үксүн ый 3-с чыыһылатыгар түһээччилэр, ол эрээри сэтинньигэ 3-с чыыһыла – өрөбүл күн.

Сэтинньи 5 күнүгэр ийэ хапытаалыттан ый аайы төлөнөр босуобуйа төлөбүрэ түһүөҕэ, оттон сэтинньи 7 күнүгэр 1,5 саастарыгар диэри оҕолоох үлэлиир төрөппүттэр эмиэ төлөбүрдэрин болдьохторун иннинэ ылыахтара. Харчы көһөрүүтэ күн устата барыан сөп.

Санатан эттэххэ, сэтинньигэ ааспыт алтынньы ыйдааҕы социальнай төлөбүрдэри ылаллар. Биэнсийэ ый ахсын 3-с чыыһылаттан 25-с чыыһылатыгар диэри төлөнөр. Төлөнөр чуолкай күнэ эрэгийиэнтэн уонна харчыны хайдах ылартан тутулуктаах. Бырааһынньык күннэригэр биэнсийэ кыраапыга уларыйар. Ити биэнсийэлээхтэр үлэлээбэт күннэртэн сылтаан төлөбүр хойутааһынын көрсүбэттэрин инниттэн оҥоһуллар. Өскөтүн төлөнөр күн бырааһынньыкка эбэтэр өрөбүлгэ түбэстэҕинэ, биэнсийэ болдьоҕун иннинэ – үксүгэр бырааһынньыктар иннилэринээҕи бүтэһик үлэ күнүгэр төлөнөр.