Сэтинньиттэн ханнык сокуоннар олоххо киирэллэрий?

Судаарыстыбаннай Дуумаҕа сэтинньи ыйтан дойду үрдүнэн ханнык саҥа сокуоннар олоххо киирэллэрин санаттылар. Саҥа сокуоннар сэтинньи 1 күнүттэн  үлэлиллэр. Чуолаан ТГ-ханааллары, учууталлары, байыаннай дьайыы кыттыылаахтарын уонна да атын эйгэни таарыйаллар. Сокуоҥҥа киирэр уларытыылары туһунан Судаарыстыбаннай Дуума спикерэ Вячеслав Володин кэпсээтэ.

• 10 тыһыынчаттан тахса сурутааччылаах блогтар уонна ханааллар испииһэгэ оҥоһуллуоҕа. Сокуон сэтинньи 1 күнүттэн күүһүгэр киирэр. Ол курдук 10 тыһыынча ааҕааччылаах блогтар уонна ханааллар тус дааннайдарын 10 үлэ күнүн устата Роскомнадзорга биэрэр эбээһинэстэниэхтэрэ. Ирдэбили толорбот түгэннэригэр угуйук таһаарар кыахтара сарбыллар, донаттары ылар бобуллар уонна кинилэр сонуннарын тарҕатыы тохтотуллар. Тохсунньу 1 күнүттэн социальнай ситимнэр дааннайдарын туттарбатах блогердар аккауннарын үлэтин тохтотор эбээһинэстээхтэр.
• Ураты харыстанар сирдэринэн биир кэлим рейдэлэр ыытыллыахтара. Маны туһанан инспектордар бу эйгэҕэ тахсар кэһиилэри суһаллык быһаарыахтарын сөп. Холобур, аһаҕас уоту туһаныыны.
• Табаары «Честный знак» бэлиэтэ суох атыылааһын тохтотуллар. Саҥа сокуон пиибэни, атах таҥаһын, фотоаппараттары, ону тэҥэ чэпчэки бырамыысыланнас табаардарын, тирии антисептиктэрин, БАД-тары, массыына көлүөһэтин эрэһиинэтин уонна парфюмерияны кытта сибээстээх.
• «Рособрнадзор көмөлөһөөччүтэ» диэн учууталга туһуламмыт чат-бот үлэлиэҕэ. Бырагыраама үлэни кытта сибээстээх араас ыйытыктарга хоруйдуоҕа. Бу бырайыак сэтинньи ыйтан Бүтүн Арассыыйа үрдүнэн үлэлиэҕэ.
• Анал байыаннай дьайыыга кыттыбытын туһунан ыспыраапканы «Госуслуги» портал уонна Элбэх өҥөнү оҥорор киин нөҥүө биэриэхтэрэ. Бу судаарыстыба өйөбүлүн туһаныыны судургутутуоҕа. Урут маннык ыспыраапкалары байыаннай чаас хамандыырдара эрэ биэрэллэрэ.