Сэттэ киинэ бырайыага Бырабыыталыстыба өйөбүлүн ылла

Саха сирин бырабыыталыстыбата олохтоох киинэ устуутун өйүүр бырайыага салҕанар. Быйылгы киинэ питчинин түмүгүнэн, сэттэ бырайыак биһирэммитэ. Киинэни устааччыларга барыта холбоон 20 мөлүйүөн солкуобайдаах өйөбүл көрүлүннэ. Сэртипикээттэри ыам ыйын 22 күнүгэр “Сахамедиа” пресс-киинигэр талар хамыыһыйа бэрэссэдээтэлэ, СӨ Бырабыыталыстыбатын бэрэссэдээтэлин солбуйааччы Сергей Местников туттартаата.

Кыайбыттар истэригэр Дмитрий Кольцов “Сулус” диэн уус-уран айымньыта бастакынан ааттанар (5,3 мөл. солк.). Санатан суруйдахха, Кольцов “Егор Чээрин” бырайыагы түмүктээбит саҥа режиссерунан буолар. Өр сылларга соһуллан хаалбыт бырайыагы сабыллыыттан кини суруйбут сценарийа уонна режиссурата быыһаабыта.

Өссө биир кыайыылаах бырайыагынан режиссер Вячеслав Семенов (“Мотуо”, “Лыах”) “Евстегнеич…” диэн уус-уран киинэтин сценарийа буолла (3,9 мөл. солк).

Бастакы үлэ номинацияҕа Апполинария Дягтерева “Присутствие” диэн үлэ ааттаах бырайыага кыайда (2,7 мөл. солк.).

Валентин Макаров өйөбүл ылан (3,5 мөл. солк.), “Ол үлэтэ” диэн ааттаах оҕо киинэтин саҕалаата.

Документальнай киинэ номинацияҕа Александр Красновскай “Колымана” (2,5 мөл. солк.), Кыйаара Юмшанова “Чолбон: саха рок-муусукатын сүрэҕэ” (733 тыһ. солк.) диэн бырайыактара биһирэннилэр.

Саха суруйааччытын айымньытын экрааҥҥа таһаарыы номинацияҕа анаммыт үп (1,18 мөл. солк.) Никандр Федоров (“Миигин кытта үҥкүүлээ”, «Оҕо саас») уста сылдьар “Хапсыһыы” диэн үлэтигэр барда. Эдэр режиссер тустуук Вячеслав Карпов туһунан дырааманы уста сылдьар.

Түһэрсиллибит сөбүлэҥ усулуобуйатынан, грант туппут киинэһиттэр үлэлэрэ икки сыл иһигэр оҥоһуллан бүтэн быракаакка тахсыахтаахтар диэн.