Сэттэ оҕолоох ийэ «Ийэ албан аата» бэлиэнэн наҕараадаланна

Кулун тутан 6 күнүгэр Үлэһит дьахталлар пуорумнарын чэрчитинэн, үөрүүлээх мунньах буолла. Манна бастыҥ уопсастыбанньык, лиидэр дьахталлары уонна элбэх оҕолоох ийэлэри наҕараадалаатылар. 7 оҕолоох ийэ Сардаана Филиппова Бүлүү улууһун 1 Күүлэт нэһилиэгиттэн кэлбит. Кини СӨ бырабыыталыстыбатын бэрэссэдээтэлэ Кирилл Бычков илиититтэн «Ийэ албан аата» бэлиэ 3-с истиэпэнин тутта. 

— 1 Күүлэт орто оскуолатыгар учууталлыыбын. 7 оҕолоохпут: улахаммыт 5-с кылааска үөрэнэр, кырабыт 9 ыйдаах. Кэргэним Бүлүү ОДьКХ тэрилтэтигэр операторынан үлэлиир. Бэйэм Сунтаар улууһун Кэмпэндээйититтэн төрүттээхпин, Бүлүүгэ кийиит буолан кэлбитим.

Оҕолорбутун иитэргэ, көрөргө кэргэммин кытта бэйэ-бэйэбитигэр көмөлөсүһэбит. Оҕолорбутун араас тэрээһиннэргэ кытыннара сатыыбыт. Бырааһынньыктары дьиэ кэргэнинэн бииргэ ыларбытын сөбүлүүбүт.

Бу тыйаатыр сыанатыттан үрдүк наҕарааданы тутан наһаа үөрдүм, долгуйдум. Олоххо биирдэ бэриллэр наҕараада дии саныыбын. Нэһилиэгим дьаһалтатыгар уонна дойдум дьонугар-сэргэтигэр махтанабын, — диэн Сардаана Ариановна санаатын үллэһиннэ.