Сэттис төгүлүн бастыҥ үлэ биэрээччилэр, инвестордар, суруналыыстар “Уһук Илин сулуһа“ бириэмийэнэн бэлиэтэннилэр

Олунньу 7 күнүгэр Арассыыйа Бырабыыталыстыбатыгар “Уһук Илиҥҥи” анал уопсастыбаннай-дьыалабыай бириэмийэни туттарыы үөрүүлээх түгэнэ буолла. Сэттис төгүлүн “Уһук Илин сулуһун” суруналыыстар, биисинэс бэрэстэбиитэллэрэ, “Гектар” судаарыстыбаннай бырагыраама кыттыылаахтара ыллылар. Наҕарааданы Бырабыыталыстыба бэрэссэдээтэлин солбуйааччы-РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев туттарда.

“2023 сыллаахха РФ Бэрэсидьиэнэ Владимир Владимирович Путин Уһук Илин сайдыытын национальнай инники күөҥҥэ турар соругунан биллэрбитэ. Кини сорудаҕар олоҕуран Уһук Илини сайыннарыы үлэтэ салгыы барар. 2800 тахса бырайыак үлэлиир. 2024 сылга 147 саҥа тэрилтэ олоххо киирдэ, 20 тыһ. үлэ миэстэтэ таҕыста. Уһук Илиҥҥэ инвестициялааһын дойду орто таһымын икки төгүл аһарар. Маастар-былааны олоххо киллэриигэ уонна оҥорууга улахан үлэ саҕаланна. Биһиги иннибитигэр 25 Уһук Илин куоратын саҥардар сорук турар. Дьон олоҕун хаачыстыбатын үрдэтии үлэтэ салгыы барар. Быйыл Уһук Илин тоҕус субъегар көспүтүнээҕэр 14 тыһ. киһинэн элбэх кэллэ. Бу үчүгэй түмүк. Бүгүн үлэҕэ ситимин быспакка кылааттарын киллэрсэр дьоҥҥо наҕараадалары туттарабыт. Бу үлэ араас эйгэтин көхтөөх, тэтимнээх, көдьүүстээх дьоно” – диэн Юрий Трутнев эттэ.

Бириэмийэ соруга – Уһук Илин үүнэр уонна XXI үйэҕэ Арассыыйаҕа сайдыы инники күөҥҥэ турар национальнай территориятынан буоларын көрдөрүү, эрэгийиэн кыаҕын туһунан дойду олохтоохторугар киэҥник иһитиннэрии, экэниэмикэ уонна биисинэс бастыҥ быраактыкаларын таһаарыы, судаарыстыбаны, уопсастыбаны, биисинэһи бииргэ түмүү, патриотическай сыаннаһы күүһүрдүү уонна олоххо киирэр социальнай, биисинэс бырайыактарга киэҥ араҥа дьон болҕомтотун тардыы.

“Барыта кыайыы туһугар” номинацияҕа кыайыылааҕынан саха хампаанньалара, “Патриотическая” ТОР резиденнэрэ таҕыстылар. «ЯКТ-Сокол» ХЭУо «Якт-Сокол Пикап 1.5» квадроциклы оҥорон таһаарар. 2023 сылтан анал байыаннай дьайыыга 363 квадроциклы тириэртилэр. «Зелёная энергия» уонна «Якутский котловой завод» хампаанньалар кимэн киирии бөлөхтөрүн байыастарыгар эрэллээх көмөлөһөөччү быһыытынан киэҥник биһирэнэр «Тимир АТ» электромотоциклы (электроэндуро) оҥороллор. Былырыыҥҥыттан 354 электроматасыыкылы тириэртилэр.

Урбаанньыттар көхтөөх үлэлэрин түмүгэр Уһук Илин эрэгийиэннэригэр үүнүү, сайдыы саҥа туочукалара тэриллэллэр, “Развитие территорий” номинациянан бэлиэтэнэллэр. Быйыл “Эльга УК” ХЭУо кыайыылааҕынан таҕыста.

Санатан эттэххэ, “Уһук Илин сулуһа” уопсастыбаннай-дьыалабыай бириэмийэ 2017 сылтан  Уһук Илин уокуругар РФ Бэрэсидьиэнин боломуочуйалаах бэрэстэбиитэлин, Уһук Илини, Арктиканы сайыннарыы министиэристибэтин, Уһук Илини, Арктиканы сайыннарыы корпорациятын өйөбүлүнэн ыытыллар. Уһук Илин сайдыытыгар сүҥкэн кылааттарын киллэрбит 100-тэн тахса урбаанньыт, тэрилтэ, уопсастыбаннай диэйэтэл, суруналыыс лауреатынан буолбуттара. Сиһилии манна ааҕыҥ.

Ил Дархан уонна Бырабыыталыстыба пресс-сулууспата.