Хаартыска: Василий Кононов түһэриитэ.
Бүгүн, балаҕан ыйын 25 күнүгэр, Саха Өрөспүүбүлүкэтин сэттис ыҥырыылаах Судаарыстыбаннай Мунньаҕын (Ил Түмэн) бастакы пленарнай мунньаҕа үлэтин саҕалаата.
Пленарнай мунньах өрөспүүбүлүкэ итэҕэлин ылан, саҥа талыллыбыт Ил Дархан Айсен Николаев тыл этиититтэн саҕаланна. Айсен Николаев быыбарга кыттарга барыгытыгар тэҥ усулуобуйалаах этигит, норуот итэҕэлин ылан норуот дьокутаата буолбуккутунан эҕэрдэлиибин диэтэ.
«Бу уустук кэмҥэ уопсастыба сомоҕолоһон бэйэтин куолаһын биэрэн, итэҕэйэн быыбардаата. Ханнык даҕаны баартыйаттан турбуккут иһин, эһиги өрөспүүбүлүкэ уонна дойду инники сайдыытын туһугар үлэлиэхтээххит. Бу кэлэр биэс сылга уустук соруктар тураллар. Судаарыстыбаннай мунньах — бу сүрүн суолталаах салаа. Мин Саха Өрөспүүбүлүкэтин баһылыга буоларым быһыытынан, норуот дьокутааттара өйүөхтэрэ диэн эрэнэбин», — диэтэ Ил Дархан.
Ол кэннэ бастакы мунньаҕы Ил Түмэн састааба талыллыар диэри КПРФ баартыйаттан талыллыбыт саамай аҕа саастаах дьокутаат Иннокентий Романов ыытар чиэскэ тигистэ.
Кини биһиги, норуот дьокутааттара, норуот олоҕун уйгута тупсарын туһугар үлэлиэхтээхпит диэтэ. «Саха Өрөспүүбүлүкэтин олохтоохторун итэҕэлин ылан норуот дьокутаата буолбуккутунан эҕэрдэлиибин. Биһиги норуот интэриэһин көмүскүүр норуот дьокутааттара, кини талбыт баһылыгын кытары биир санаанан салайтаран үлэлиэхпит», — диэтэ Иннокентий Романов.
Норуот дьокутааттара аан бастаан сэттис ыҥырыылаах Судаарыстыбаннай Мунньаҕын сэкэритэрийээтин таллылар. Салгыы СӨ Киин быыбардыыр хамыыһыйа бэрэссэдээтэлэ Евгений Федоров балаҕан ыйын 8-10 күннэригэр буолан ааспыт быыбар түмүгүн туһунан отчуоттаата.
Ол кэннэ мандаат хамыыһыйатын уонна хамыыһыйа бэрэссэдээтэлин талыахтара. Бэбиэскэ быһыытынан, сэттис ыҥырыылаах Ил Түмэн норуот дьокутааттарын боломуочуйалара бигэргэниэ, салгыы счетнай хамыыһыйа састааба талыллыа.
Дьэ, ол кэнниттэн сэттис ыҥырыылаах Судаарыстыбаннай Мунньах (Ил Түмэн) Бэрэссэдээтэлин уонна солбуйааччыларын талыахтара. Итини таһынан норуот дьокутааттара Арассыыйа Федерациятын сенаторын – Федерация Сэбиэтигэр Саха сирин парламенын бэрэстэбиитэлин быһаарыахтара.
Салгыы СӨ сэттис ыҥырыылаах Ил Түмэнин сис кэмитиэттэрин уонна хамыыһыйатын бэрэссэдээтэллэрин талыахтара. Ол курдук Ил Түмэҥҥэ 13 сис кэмитиэт баар, онно бэрэссэдээтэллэри бигэргэтиэхтэрэ.
Иккис күнү түмүктүүр боппуруостарынан «Саха Өрөспүүбүлүкэтин Ил Түмэнин туһунан» СӨ Сүрүн сокуонун 10 ыстатыйатын 1 чааһыгар сөп түбэһиннэрэн сэттис ыҥырыылаах Ил Түмэн Сэбиэтин састааба уонна 13 ыстатыйа 2 чааһыгар олоҕуран парламент аппаратын бэрэссэдээтэлэ бигэргэниэ.
РФ Социальнай пуондатын 2025 сыллааҕы дааннайдарынан, куоракка олорор дойду олохтоохторун орто биэнсийэлэрин кээмэйэ тыа сирин…
Бүгүн, атырдьах ыйын 31 күнүгэр, өрөспүүбүлүкэ икки улууһугар быстах кэмҥэ өрөмүөн үлэтэ ыытылларынан сибээстээн, күн…
Бүгүҥҥү күн Кыыс бэлиэтигэр киирэн, биһигиттэн чопчу буолууну, болҕомтону уонна олоҕу сааһылааһыны ирдиир. Дьыалаҕа-куолуга, үлэҕэ-хамнаска,…
Өрөспүүбүлүкэ үгүс улуустарынан бүгүн, атырдьах ыйын 31 күнүгэр, сөҥүүтэ суох, сылаас күн. Сорох сиринэн быстах…
Үнүр солуоҥҥа тыҥырах оҥорторо тиийдим. Дьоҕус остуолга “Хаас оҥорторорбор гепатит, СПИД, сифилис уо. д. а. ыарыылар сыстыахтарын…
Бүгүн, атырдьах ыйын 30 күнүгэр, Дьокуускай куоракка Саха гимназиятыгар уопсастыбанньыктар, волонтердар, төрөппүттэр, үөрэнээччилэр кыттыылаах "Дьокуускай…