Сөтүө кэмэ саҕаланыаҕыттан 16 киһи суорума суолланна

Быһылаан өссө тахсыбатын туһугар ГИМС иниспиэктэрдэрэ сэрэтэр эриэйдэлэри ыыталлар

Кылгас сайыннаах буоламмыт, күн итийдэ да ууга чомполонор, сөтүөлүү сүүрэр идэлээхпит. Ол гынан баран, хомойуох иһин, ууга былдьаныы тахса турар. Ааспыт нэдиэлэҕэ Даркылаахха 29 саастаах эр киһи ууга былдьанна. Саха сирин үрдүнэн 16 киһи суорума суолланна.

Быһылаан эбиллэ турбатын туһугар ГИМС иниспиэктэрдэрэ Дьокуускай куорат дьаһалтатын бэрэстэбиитэллэрин уонна ИДьМ үлэһиттэрин кытта Өлүөнэ өрүс устун ууттан сэрэтэр эриэйдэлэрин күүһүртүлэр, диэн иһитиннэрэр “Вести Саха”. Кинилэр куорат сөтүөлүүр сиригэр сынньана сытар дьоҥҥо иһитиннэрэр-сэрэтэр листовкалары туттардылар.

Биһиги киин куораппытыгар биир эрэ сиргэ, 202 түөлбэҕэ куорат боротуокатын кытылыгар, сөтүөлүүр көҥүллэнэр. Атын билбэт уугар сөтүөлүүр кутталлаах.