«Северная заря» хаһыат 80 сыллаах үбүлүөйүн бэлиэтээтэ

Бүгүн, ыам ыйын 1 күнүгэр, Өймөкөөн улууһун нууччалыы тыллаах «Северная заря» оройуоннааҕы хаһыата 80 сыллаах үбүлүөйүн бэлиэтээтэ. 

1945 сыл ыам ыйын 1 күнүгэр Өймөкөөн оройуонугар «Северная заря» хаһыат 1-кы нүөмэрэ тахсыбыта. Хаһыаты Индигиирдээҕи хайа-бырамыысыланнаһын управлениетын Политдьыалата (ИГПУ, кинини салҕааччы — Индигирзолото кэмбинээт) төрүттээбитэ. Хаһыат 80 сыл устата аата араастаан уларыйбыта «Новый Север», «Заря Севера», онтон «Северная заря».  Бу сыллар тухары оройуон нууччалыы тыллаах хаһыатын ааҕааччылара көмүсчүттэри кытта – бириискэлэргэ, эмчиттэри кытта – балыыһаларга, учууталлардыын – оскуолаларга,«Северкалыын» ыанньыксыттары кытта – пиэрмэҕэ уонна сайылыктарга, сылгыһыттары кытта – кинилэр үүтэннэригэр, табаһыттары кытта – ыстаадаларга,  быһата, ханна-ханна тиийбэтэхтэрэй. «Северная заря» Өймөкөөн улууһугар биир иллээх дьиэ кэргэн курдук олорор араас омук дьонун ураты сылаас тыыннаан, сомоҕолоон кэллэ. Билигин хас биирдии хаһыат сирэйин арыйан көрдөххө, өймөкөөннөр олохторун усторуйата арылхайдык арыллан кэлэр, ол кэминээҕи салгын хаттаан илгийэр.

«Араас сылларга үлэлээн ааспыт эрэдээктэрдэр, суруналыыстар, фотокоррдар – хас биирдиилэрэ тугунан да сыаналаммат тус-туспа буочардаахтар. Кинилэр ууларын төһөлөөх хаммакка, тото-хана аһаабакка, массыынанан айаннаан, бөртөлүөтүнэн, сөмөлүөтүнэн көтөн, оҥочонон устан, оройуон историятын суруйбуттара буолуой?! Оччолорго кинилэр тустаах үлэлэрин толорор курдук сананан эрдэхтэрэ. Оттон ол билигин – Өймөкөөн улууһун хаһан да хатыламмат үйэлэргэ хаалбыт дириҥ ис хоһоонноох устуоруйата. Ол да иһин буоллаҕа, кинилэр үлэлэрин түмүгэ – бүгүҥҥү ааҕаччылар махталлара», диэн бэллиэтээтэ улуус баһылыга Александр Оконешников. 

«Северная заря» хаһыакка кырдьаҕас хаһыатчыттар Боян Винокуров, Александра Самотаева, Галина Степанова олохторун анаабыттара.   Альбина Киян, Олег Солодухин курдук талааннаах суруналыыстар үлэлээн ааспыттара. 80 сыл тухары төһөлөөх айар куттаах үлэһит «Северная заря» хаһыакка үлэлээн ааспыта буолуой!

Бүгүн улуус киинигэр Уус-Ньара бөһүөлэгэр  «Металлург» Култуура дьиэтигэр  Улуу Кыайыы үөлээннээҕэ хаһыат 80 сыллаах үбүлүөйүн көрсө үөрүүлээх тэрээһин буолан ааста. Тапталлаах «Северкаларын» үбүлүөйдээх күнүнэн ааҕааччылар, улуус дьаһалтатын, Муниципальнай сэбиэт, «Уус-Ньара бөһүөлэгэ» МТ, тэрилтэлэр салайааччылар эҕэрдэ тылын бастыҥын эттилэр.

Саха бэргэн өс хоһооно этэринии: «Ойуурдаах куобах охтубат». Ол тэҥэ – ааҕааччылаах хаһыат эстибэт.

Хаһыат айар үлэһиттэригэр «санаабыккыт кэмигэр туолан истин, элбэх ааҕааччыланыҥ, сытыы бөрүөҕүт сыппаабатын» диэн алгыспытын тиэрдэбит.