Швейцарияттан кэлбит турист Победа хайатын дабайар баҕалаах

Саха сирэ ыраахтан кэлэр туристары бэйэтин ураты, киһи атаҕа тиийбэтэх кэрэ айылҕатынан умсугутар.

Швейцарияттан кэлбит турист Беста Мацей Збигнев олунньу тымныытыгар Муома улууһугар баар Победа хайатын дабайан, бэйэтин кыаҕын тургутан көрөргө быһаарыммыт. Бу туһуна СӨ Быыһыыр сулууспата иһитиннэрэр.
Кини соҕотоҕун айанныа. Онтон айанныыр ньымата — араас. Уопуттаах айанньыт снегоходунан, хайыһарынан уонна сатыы үрдүк хайаны дабайар былааннаах.
Санатан эттэххэ, Победа хайатын үрдүгэ 3003 миэтэрэ. Турист альпинизмынан дьарыктаммыт, улахан уопуттаах уонна соҕотоҕун айанныырын сөбүлүүр.
Мацей Беста Саха сирин Быыһыыр сулууспатыгар бэлиэтэммит, куттал суох буолуутун туһунан инструктаһы ааспыт. Кини ханна сылдьарын спутник ситимин нөҥүө биллэрэ туруоҕа.

Хаартыска: СӨ Быыһыыр сулууспатын архыыбыттан.