Тыа сиригэр туһалаах тэрээһин, кэскиллээх кэпсэтии

Горнай улууһуттан Атамай нэһилиэгин ыччата Үөһээ Бүлүүгэ Өргүөккэ уонна Ороһуга баран гостуруоллаан кэллибит.

Маннык айан-сырыы сибээһи бөҕөргөтөр сыаллаах-соруктаах ыытылынна. Бастакы күн Өргүөттэн саҕаланна. Өргүөттэр биһигини сылаас, минньигэс астаах-үөллээх, итии чэйдээх көрүстүлэр. Билсиһии, истиҥ сэһэргэһии кэнниттэн волейболга күрэхтэстибит, төгүрүк остуол тула ирэ-хоро кэпсэттибит, санаабытын үллэһиннибит. Киэһээҥҥи өттүгэр Атамай нэһилиэгин көхтөөх дьонун күүһүнэн туруоруллубут “Дэриэбинэ долгуна” диэн кэнсиэр буолла. Сарсыныгар Өргүөт уһуйааныгар уонна оскуолаҕа сырыттыбыт, нэһилиэккэ ыытыллар үлэлэрин-хамнастарын, успуорка, култуураҕа ситиһиилэрин туһунан иһиттибит.

Айаммыт иккис күнүгэр Гаврил Николаев аатынан «Ороһутааҕы сынньалаҥ киинигэр» эҕэрдэ киэһээбитин бэлэх ууннубут. Онон көрөөччүлэр икки нэһилиэгинэн дуоһуйа сынньаннылар, ырыа-үҥкүү абылаҥар уйдардылар.

Айаммыт-сырыыбыт табылынна, туһалаах тэрээһин буолла. Онон үөрэн-көтөн тураммыт үрдүк таһымҥа көрсүбүт Өргүөт баһылыгар Василий Васильевич Абраховка, нэһилиэктэр сынньалаҥ кииннэрин дириэктэрдэригэр, кэлэктииптэригэр, олохтоохторугар улаханнык махтанабыт. Махтал тылларын тиэрдэбит Өргүөт олохтооҕор Анастасия Афанасьевна Захароваҕа. Кини элбэх киһини хоннордо, минньигэс, сылаас аһынан күндүлээтэ, истиҥник кэпсэтэн биһигини наһаа үөртэ. Бука барыгытыгар чэгиэн доруобуйаны, туох баар үтүөнү, кэрэни баҕарабыт. Сыралаах үлэҕит сыаналаннын. Мэлдьи үөрүү-көтүү үктэллэниҥ, дьол, үөрүү аргыстаныҥ. Махтал тылларын тиэрдиэхпитин баҕарабыт култуура дьиэтэ киэн туттар, нэһилиэкпит талааннаах, ырыа куттаах, үҥкүү абылаҥар уйдарар дьоммутугар: Юлиана Геннадиевнаҕа, Сардаана Ивановнаҕа, Петр Жирковка, Саина Саввиноваҕа, Савва Захаровка, Сааскылаана Жирковаҕа, Александр Максимовка. Үлэҕитигэр, тус олоххутугар ситиһиилэри. Дьон махталын өрүү ыла тураргытыгар баҕарабыт.

Анна Дмитриева

Атамай, Горнай.

Хаартыскалар ааптар тиксэриилэрэ