Сибэкки оннугар — аһымал аахсыйаҕа кыттыы

«Харысхал» пуонда «Добро в руках» аһымал аахсыйаны тэрийэн ыытта. Манна араас улуустартан 936 үөрэнээччи кытынна. Аахсыйаҕа барыта 257 775 солкуобайы хомуйдулар.

Бу аахсыйаҕа кыттар оҕолор учууталга тыһыынчанан сыаналаах сибэккини тус-туспа  ылалларын оннугар, биир улахан дьөрбөнү бэлэхтииллэр, оттон ордубут харчыларын аһымал аахсыйаҕа ыыттылар. Чахчыта, 20-30 сибэкки дьөрбөтө төһө да кэрэтин, учууталлары үөрдүбүтүн иһин, аҕыйах күнүнэн кэхтэн хаалар, бөххө быраҕыллар буоллаҕа.

Ол курдук, Амма, Бүлүү, Горнай, Мэҥэ Хаҥалас, Мииринэй, Нам, Нерюнгри, Усуйаана, Хаҥалас улуустарын, Дьокуускай куорат оскуолаларын үөрэнээччилэрэ кытыннылар.

Покровскай куораттан алта оскуола кытынна. Оттон Мииринэй куорат 26-с №-дээх оскуолатын 2-с «г» кылааһын оҕолоро 21 500 солкуобайы хомуйан ыыттылар. Дьокуускай 4-с уонна 22-с №-дээх коррекционнай оскуолаларын 9-с «а» уонна 8-с «а» кылаастара эмиэ кытыннылар. Бэл диэтэр, киин куорат 35-с №-дээх оскуолатын 1-кы «в» кылааһыгар киирэр кырачааннар эмиэ кыттыбыттар.

Өрөспүүбүлүкэ үрдүнэн барыта 47 кылаас, 1 тыһыынча кэриҥэ оҕо кытынна. Санатар буоллахха, бу маннык аахсыйалар атын эрэгийиэннэргэ, куораттарга эмиэ ыытыллаллар.

Бу туһунан «Харысхал» пуонда иһитиннэрэр уонна хас биирдии кыттыбыт оҕоҕо, төрөппүккэ, учууталга махталын биллэрэр. Хомуллубут үп инбэлиит оҕолоох ыалларга көмө быһыытынан бэриллиэҕэ.