Сибэккигэ ууну хайдах кутабыт?

Иһинэн-таһынан, дьалкытан, элбэх ууну кутартан буорга баар сибэккигэ олус наадалаах битэмииннэр, иҥэмтэлээх эттиктэр суураллаллар.

Көһүйэ буора инчэҕэй буолар, сиик үөннэрэ үөскүүллэр. Сибэкки силистэрэ сытыйан, сэбирдэхтэрэ өлбөөдүйэн, ньалбайан хаалаллар. Оттон уута ситэ кутуллубатах үүнээйилэр аччыктыыллар, силистэрэ куураллар. Онон ууну көрөн кутуохха наада.

Элбэх ууну ирдииллэр: бөдөҥ, чараас сэбирдэхтээх, сииги элбэхтик көтүтэр сибэккилэр уонна сибэккилэнэр сибэккилэр. Ханнык баҕарар сибэкки, иһитэ түгэҕинэн салгын киирэригэр анаан элбэх хайаҕастаах уонна халыҥ дренажтаах буоллаҕына, үчүгэйдик үүнэр. Арыый аҕыйах ууну саҥа үүнэн эрэр сибэккилэргэ уонна арассаадаларга кутабын. Силистэрэ сүрдээх нарын, саҥа сайдан эрэр буолан, сииги иҥэринэ охсубаттар. Элбэх ууну куттахха «хара атах» ыарыы сутуйар.

Е.Гаврильева-Сибэкки Дуунньа,

«Үрдүк үүнүү кистэлэҥэ» кинигэтиттэн.

(«Айар», 2023  с.)