«Сибэккилэр түһүүллэр» кэнсиэркэ ыҥыраллар

Алтынньы 24 күнүгэр киэһэ 18.00 чаастан Марфа уонна Сергей Расторгуевтар ааттарынан Саха цииркэтигэр Гаврил Николаев төрөөбүтэ 50 сылыгар аналлаах «Сибэккилэр түһүүллэр» кэнсиэркэ ыҥыраллар.

Дьон кутун туппут чаҕылхай сулус сүрэххэ сөҥмүт ырыалара «Туймаада» судаарыстыбаннай ырыа ансаамбылын толоруутугар ылланыахтара.

Кыттыыны ыллыахтара:
-«Туймаада» ансаамбыл артыыстара;
-Гаврил Николаев аатынан «Умнуллубат ол сулус» күрэх кыайыылаахтара: Вилена Ларионова, Василий Власьев, Наталья Ильина;
— Бииргэ төрөөбүттэрэ Сандаара, Александр Николаевтар;
— Доҕотторо Александр Ущницкай, Илья Николаев, Серафим.

Ганя оскуолаҕа үөрэнэ сырыттаҕына: «Аҕаҥ олус үчүгэйдик ыллыыр, эн да ыллыыр буолуохтааххын» диэн сценаҕа таһаарбыттара. Уолчаан аҕата ыллыыр Валерий Ноев «Хатыҥчааным барахсан» диэн ырыатын олус сөбүлүүр буолан, иһигэр ыллаан киҥинэйэ сылдьыбыт кэмэ этэ. Онон сценаҕа ыллаабыт бастакы ырыатынан «Хатыҥчааным барахсан» буолбута. Онтон ыла уус-уран самодеятельность кэнсиэрэ буолла да, Ганята суох табыллыбат буолбута. Оскуоланы бүтэрэн баран, биир саастыылаахтарын курдук, киин куоракка таласпатаҕа. Икки сыл тырахтарыыстаан, сопхуос араас үлэтигэр сылдьан баран, кулуупка уус-уран салайааччынан үлэҕэ киирбитэ. Улууска ыытыллар «Хотун Бүлүү», «Үрүҥ түүн» уо.д.а. кэнсиэртэргэ кыттан гран-при, лауреат ааттарын ылан бастакы ситиһиилэр сиэттиспитинэн кэлбиттэрэ.

1994 с. Үөһээ Бүлүү оркестрыгар солист быһыытынан ылыллыбыта. 1995 с. «Дьокуускай-95”, 1997 с. Туой Хайаҕа («Киэһээҥи Бүлүү» ырыатынан) куонкурустарга лауреат буолбута. Туой Хайаҕа лауреат буолбут күнүгэр Дьокуускайга кэлэн, М.Жирков аатынан музыкальнай училищеҕа туттарсыбыта. 1998 с. күһүн «Туймаада» ансаамбылга вокалиһынан кэлбитэ. Ансаамбылга кииирэн баран, «Олоҥхо дойдута ыллыыр», «Мин дойдубун – өрөспүүбүлүкэбин туойабын» өрөспүүбүлүкэтэҕи куонкурустарга «Сааскыга», «Экчи тыл» уонна «Махтал эйиэхэ, Сахам сирэ» ырыаларынан эмиэ лауреат үрдүк аатын сүкпүтэ