Сибэккинэн симэммит саха балаҕаннаах Чемпосовтарга

Билигин үгүс ыал тэлгэһэтигэр балаҕан туттар буолла. Сунтаарга Һэндэл, Ераскумовтар балаҕаннарын кытта Эконовтар Олоҥхо балаҕанын арыйбыттара. Ону кытта Хомустаах түɵлбэтигэр Чемпосовтар балаҕан туттан, тэлгэһэлэрин сибэккинэн симэнэн ыалдьыттары көрсөллөр.

Сахалыы тыыннаах, ааныгар икки ымыы чыычаах урамньылаах олбуору арыйааккын кытары сибэкки сыта дыргыйар, кэрэ кɵстүү эйигин угуйар. Софья, Артем Чемпосовтар Сунтаар нэһилиэгин дьоһун-мааны ыаллара тэлгэһэлэригэр саха балаҕанын туттан ытык-мааны ыалдьыттарын сахалыы сиэринэн-туомунан кɵрсɵллɵр.

Балаҕаҥҥа киирдэххэ умайа турар кɵмүлүɵк, эҥинэ дьикти кэрэ тигиилэр, уран оҥоһуктар хараҕы кэрэхсэтэллэр. Манна бааллар кыһыллан оҥоһуллубут долбуур, чыычаах, дьөһөгөй оҥоһуктар, оҕуруонан дьэрэкээн киэргэллэр, кэрэ бэйэлээх иһиттэр, маһынан урамньылар.

Софья ɵйүгэр ыралаабытын эр киһи тутан-хабан, ураннаан олоххо киллэрэн, ыаллар иккиэн бэйэ-бэйэлэрин ситэрсэн биэрэллэрин кэрэ бэйэлээх тэлгэһэлэрэ толору кэпсиир. Балаҕаны кэккэ аҕыс кырыылаах беседка, фотозона, өлгөм үүнүүлээх тэпилииссэ, дьоҕус буола. Бааллар жирафа, баабыр, хаххан, куба, бэл диэтэр кыра кɵлүччэ, сиэнчээннэргэ анаан трон кириэһилэлэр. Софья иистэнэр, үүнээйи арааһын үүннэрэр, онтон Артем иллэҥ кэмигэр тэтиҥ маһынан массаастыыр тэрили, ɵтүйэни оҥорон атыылыыр эбит. Дьиэ кэргэн тэлгэһэтин, саха балаҕанын Кыайыы 80 сылынан сэрии бэтэрээнэ, сылгыһыт эһэлэрин Семен Павловы ытыгылаан, үйэтитэн Чороон тɵбɵлɵɵх сэргэ толорор.

Дьэ, бу курдук таптаһар сүрэхтэр Айыһар диэри ɵйдɵһɵр ɵй үүн диэн алгыһынан айаллар-туталлар, сайдаллар, олоххо кэрэни бэлэхтииллэр.

Тускулаана ГОРОХОВА-КОБЕЛЬЯНОВА