Сибиэрэп ансаамбылын кыттыылаахтарын кытта Ыгыаттаҕа

Сунтаар Ыгыаттата — Кыыл Уолун ытык сирэ. Бу сир миэхэ, Сунтаар дьонугар, Сибиэрэп аймахтарыгар, үөлээннээхтэригэр, кынаттарыгар уонна саамай Сибиэрэп ансаамбылын кыттыылаахтарыгар олус күндү сир.

Манна «Оһуор» ансаамбыл кыттыылаахтарын кытта үтүө үгэскэ кубулутан биэс сыл буола-буола көрсүбүппүт быйыл үһүс төгүлэ. Хайыы үйэ уонтан тахса сыл ааспыт, ол бастакы сырыыбытыттан. Онтон бэттэх элбэх уларыйыы…

Быйыл Сибиэрэп үбүлүөйдээх сылыгар Ыгыаттаҕа тахса сылдьыбатым диэн санаа буолбутум, арай кыргыттарбыттан (ансаамбыл
кыттыылаахтарын кыргыттарым, уолаттарым диэн сөбүлээн ааттыыбын) ыҥырыы кэлэн олуһун үөрдэн алгыс маанытын анатан, ыллаан-үҥкүүлээн, оһуокайдаан, астына дуоһуйан кэллим. Күндэйэттэн Евдокия Ивановна Трофимова анаан кэлэн олус долгутта. 1957 сыллаахха Москваҕа үҥкүүлээбит ыччаттартан билигин икки киһи аттыбытыгар баарыттан биирдэстэрэ кини. Атырдьах ыйыгар 90 сааһын туолар, кинини Сибиэрэп 18 саастааҕар ансаамбылыгар ыҥыран үҥкүүлэппит, кэлин Евдокия Ивановна учуутал буолан кини аатын үйэтитиигэ улахан олук уурбута. Кымня Муксуновна Кривошапкина, Маргарита Федоровна Сидорова уонна кыыстара Лена Ким «Оһуор үҥкүүтүгэр» удаҕан оруолун толорбут үс көлүөнэ далбардара быйыл ыһыахха Ленкалара үҥкүүлээбитин көрөн өрө көттүбүт диэн астына кэпсээтилэр. Атыы-эргиэн туйгуна Елизавета Ивановна Павлова — киинэҕэ уһуллубутун бу баардыы өйдүүр, хроника диэн ааттаан Сибиэрэп туһунан көрөр киинэбитигэр чороону тутан түһүлгэҕэ киирэр эдэркээн кыыс кини эбит дии. Кинини кытта ол кэмҥэ эдэр эр бэрдэ, мусукаан Юрий Егорович Иванов, кини билигин Бордоҥ олохтооҕо, 2015 сыллаахха Москваҕа сылдьарбытыгар саамай сирдьиппит кини этэ. Елизавета Романовна Иванова кэпсээниттэн Сибиэрэп улахан уолун Борокуоппай туһунан элбэҕи биллим. Елизавета Ыгыаттаҕа төрүт түөлбэтигэр кэлэн олус астынна. Венера Гаврильевна, Анатолий Прокопьевич Ивановтар — Сибиэрэп холбообут күндү дьоно ыал буолбуттара номнуо уонча сыл ааспыт эбит, соторутааҕыта эрэ «сиэттиһиҥ, кыыскын отой көрө сырыт», — диэн дьээбэлиирим бу баар курдуга.

Любовь Николаевна Афанасьева — түмэл хаһаайката үлэһиттэринээн Капалыын, Болуодьалыын астына-дуоһуйа көрсүбүттэригэр барҕа махтал. Бу кэрэ түһүлгэни Анастасия Павловна Уарова кэлэн ырыатынан, оһуокайынан киэргэттэ.

Түмэлбитигэр быйыл ураты болҕомто ууруллан өрөмүөн үлэтэ барбыт, эркинэ дьэрэкээн ойуунан киэргэммит, үрдэ халлааны ойуулуур бэртээхэй оҥоһууламмыт, түннүктэрэ саҥардыллыбыт, муостата күөҕүнэн тэлгэммит. Бу манна Сибиэрэп түмэлин салайааччыта Альбина Алексеевна Федорова бэйэтэ уолаттарынаан кэлэн үлүгэрдээх үлэни ыыппытын көрөн-истэн махтайдыбыт. Элбэҕи ыллаатыбыт, оһуору үҥкүүлээтибит, оһуокайдаатыбыт, чалбараҥнаатыбыт, хаартыскаланныбыт, үөрдүбүт-көттүбүт. Саамай сүрүнэ, ытык Ыгыатта сиригэр ыалдьыттаатыбыт, алгыс
маанытын ыллыбыт, өрө көтөҕүлүннүбүт, аны биэс сылынан көрсүөх буоллубут! Кыргыттарым, этэҥҥэ буолуҥ, чэгиэн сылдьыҥ!

Тускулаана ГОРОХОВА-КОБЕЛЬЯНОВА