Сиэнин уорарга үөрэппит…

Мииринэй оройуонун  борокуратуурата  66 саастаах киһиэхэ тэриллибит холуобунай дьыалаҕа судаарыстыбаннай буруйдааһыны бигэргэттэ. Кини Арассыыйа Холуобунай кодексын 158 ыстатыйатын 2 чааһын «б» пуунунан (уоруу) уонна  150 ыстатыйатын 3 чааһын «б» уонна «в» пууннарынан (сокуоннай саастарын ситэ илик оҕону буруйу оҥорууга кытыннарыы)  буруйданна.

Суут быһаарбытынан, бу киһи 15 саастаах сиэниттэн уонна  буруйу оҥорор кэмигэр 14 сааһын туола илик сиэнин доҕоруттан ыскылаакка киирэр суолу уонна миэстэни көрдөрөргө көрдөспүт.

Онтон түүн сууттанааччы уонна эрдэҕэс оҕолор ыскылаакка киирэн, аһы-үөлү, арыгыны уорбуттар, уоруллубут малларын үрүксээктэригэр уонна анаан илдьэ кэлбит бакыаттарыгар уган илдьибиттэр.

Суут, судаарыстыбаннай буруйдааччы санаатын учуоттаан, эр киһини икки сыллаах усулуобунай болдьоххо көҥүлүн быһарга бириигэбэрдээтэ уонна 20 000 солк. ыстараабы төлүүрүгэр быһаарда.

Суут буруйдаммыт эр киһи сиэнин холуобунай дьыалатын туспа көрбүт уонна иитиигэ  булгуччулаах миэрэни олохтуурга дьаһал таһаарбыт.

Холуобунай дьыаланы Арассыыйа Ис дьыалаҕа министиэристибэтин Мииринэй оройуонун управлениетын Силиэстийэлиир управлениетын силиэдэбэтэлэ бэрэбиэркэлээтэ. Бириигэбэр сокуоннай күүһүгэр киирэ илик.