Сиэстэрэ авиабилиэт атыылаһыыга түөкүннээн суукка эппиэттиэҕэ

Дьокуускайга авиабилиэттэри түөкүннээһин туһунан холуобунай дьыала суукка барда. Эрдэ сууттана сылдьыбатах 48 саастаах мэдиссиинискэй сиэстэрэ буруйданар. Бу туһунан Арассыыйа ИДьМ тырааныспарга Хотугулуу-Илиҥҥи линейнэй управлениета иһитиннэрэр.

Ол курдук, буруйданааччы дьахтар 2023 сыл ахсынньытыгар «Дьокуускай-Москва-Калининград» хайысханан айаннаабытын туоһулуур сымыйа билиэт маршрутнай квитанциятын биллибэт киһиттэн 25 тыһ.солк. атыыласпыт. Ол сымыйа докумуоннары уонна илии баттаабыт авансовай отчуоту сынньанан кэлбитин айанын харчытын толуйтараары үлэлиир тэрилтэтигэр биэрбит. Хоромньу 145 тыһ.солк. тэҥнэспит.

Тырааныспар полициятыгар түөкүннээһин тахсыбытын туһунан мэдиссиинэ тэрилтэтин сүрүн бырааһа иһитиннэрбит. Билигин бу холуобунай дьыаланан буруйдуур акт оҥоһуллан суукка ыытыллыбыт.