Сиик сытын таҥастан хайдах ыытабыт?

Сиик ылбыт таҥас сыта сууйдахха да баран биэрбэт.

Маннык таҥаһы итии ууга хаһаайыстыбаннай мыыланы суурайан уган чаас аҥаара — чаас кэриҥэ илитэбит. Ол кэнниттэн таҥас сууйар массыынаҕа эмиэ хаһаайыстыбаннай мыылаттан оҥоһуллубут бороһуогу (маҕаһыынтан булуохха сөп) кутан сууйабыт, сыты тупсарар кондиционеры эбиэххэ сөп.

Таҥаһы массыынаҕа сууйтарбыт кэнниттэн, наскы аҥаарын көрдөөн күнү-дьылы барыах кэриэтэ анал туттарар (прищепка) атыылаһыахха сөп (биир хааҕа 20 устуука киирэр). Сууйуох иннинэ наскылары туттаран массыынаҕа угабыт, сууйтарабыт, ол кэнниттэн хостоон анал күрүчүөккэ ыйыыбыт. Туттарыллыбытынан куурдан, ыскаапка сааһылаан угуохха сөп.

Сырдык, маҥан таҥаһы үчүгэйдик сууйарга өссө биир ньыма: 2 ост.нь.суоданы уонна 100 мл водород перекиһин сууйар тааска кутабыт, таҥаспытын чаас кэриҥэ илитэн баран сууйабыт.

Саха ыалын халандаарыттан

«Айар» кинигэ кыһата, 2025 с.