Сиинэ очуостарыгар туристар саҥа маршруттара аһыллыаҕа

Сиинэ очуостарыгар туристар саҥа маршруттара аһыллыаҕа – экология ыллыгын оҥоруу бырайыагын олоххо киллэрии туһунан урбаан, эргиэн уонна туризм миниистирэ Георгий Андреев социальнай ситимнэринэн быһа эпиир кэмигэр иһитиннэрдэ.  Кини этэринэн, Хаҥалас улууһа өрөспүүбүлүкэ сүрүн туристическай улууһунан ааҕыллар уонна саҥа маршруттары сайыннарарга улахан кэскиллээх.

“Быйыл олоххо киллэрэн саҕалаабыт саҥа бырайыакпыт туһунан кэпсиэхпин баҕарабын. Бу  Сиинэ очуостарыгар экологическай ыллык буолар. Бырайыак олоххо киирэн эрэр” – диэн Георгий Андреев иһитиннэрдэ.

Экологическай ыллык биир километр уһуннаах.

“Онно инфраструктура барыта баар буолуоҕа: хаамар сир, үөһэттэн көрөр былаһаакка уонна табыгастаахтык сынньанарга ирдэнэр тэрил (элемент) барыта. Бырайыак суумата 70 мөл. солк. тахса, икки сыллаах. Үлэ бара турар, эбийиэги эһиил күһүн үлэҕэ киллэрэр былааннаахпыт” – диэн Георгий Андреев кэпсээтэ.

Бу туһунан СӨ Ил Дарханын уонна Бырабыыталыстыбатын пресс-сулууспата суруйар.