Сииттэ түмсүүлээх түһүлгэтигэр

Быйыл Арассыыйаҕа Норуоттар сомоҕолоһууларын, Саха Өрөспүүбүлүкэтигэр Култуура, Кэбээйи улууһугар Олоҥхо, Сииттэ нэһилиэгэр Норуот айымньытын сыллара биллэриллэн тураллар.

Тохсунньу 23-24 күннэригэр Сииттэ нэһилиэгэр Олоҥхо уонна Култуура сылларыгар аналлаах улахан тэрээһиннэр буолан аастылар. Кэбээйи улууһугар Олоҥхо ыһыаҕар бэлэмнэнии  чэрчитинэн Олоҥхо дьиэлэрин ситимиттэн Лиэнискэй сэлиэнньэтин, Нам улууһун Прокопий Ядрихинскай — Бэдьээлэ аатынан Олоҥхо дьиэтин дириэктэрэ Вера Колпашникова, олоҥхо дьиэтин сүрүн исписэлиистэрэ Владимир Сыромятников, Руслан Павлов, норуот маастара Руслан Захаров, Мэҥэ  Хаҥалас улууһун Гаврил Колесов аатынан Олоҥхо дьиэтин фольклор салаатын үлэһитэ, «Олоҥхо батл» кылаан кыайыылааҕа Аксиния Степанова, Олоҥхо тыйаатырыттан лектор, бөлүһүөк, поэт, ырыаһыт  Виктор Стручков, Култуура уонна искусство коллеһыттан фольклор салаатын преподавателэ Михаил Винокуров, Аартыкатааҕы Эпос уонна ускуустуба киинин холбоһуктаах култуурунай-методическай десана кэлэннэр, көхтөөх, таһаарыылаах үлэ барда.

Бөлөҕү Аартыкатааҕы эпос уонна ускуустуба салаатын сүрүннүүр үлэһитэ Евдокия Николаевна Иванова салайан илдьэ сырытта. Икки күн устата фольклор көрүҥнэригэр: оһуохайга, хомуска, тойукка, норуот ырыатыгар, кырыымпаҕа, олоҥхону олоҕурбут ньыманан толорууга үөрэннибит, «Олоҥхо — олох оҥкула» күн-ый халандаарынан олоҕу дьаһаныы, ыһыах туһунан лекциялары иһиттибит, «Эр киһи — дьиэ кэргэн тирэҕэ» эр дьону түмэргэ аналлаах кэпсэтиилэр буолан аастылар. Олоҥхо ыһыаҕар бэлэмнэнэр НМК тула төгүрүк остуол, сүбэ-соргу ыытылынна. Ону таһынан, кылгас кэмҥэ бэлэмнэнэ охсон, култуурунай-методическай холбоһук  кыттыылаахтара Сииттэ олохтоохторун кытта «Сииттэ түмэр түһүлгэтэ» диэн дьиҥ сахалыы тыыннаах бэртээхэй кэнсиэри туруордубут. Кэнсиэрбитин  сомоҕолуур оһуохайынан түмүктээтибит. Прокопий Ядрихинскай — Бэдьээлэ аатынан Олоҥхо дьиэтин дириэктэрэ Вера Колпашникова уонна Артем Аргунов аатынан норуот айымньытын дьиэтин дириэктэрэ Марианна Сивцева бииргэ үлэлэһэр сөбүлэһиигэ илии баттастылар.

Онон дьоҕус нэһилиэк холугар дириҥ ис хоһоонноох үлэ ыытылынна. Маны  өйөөн, транспортнай кыһалҕатын  быһаарбыт олохтоох дьаһалта баһылыгар Семен Тимофеевка махтанабыт. Ону таһынан култуурунай-методическай десант кыттыылаахтара сынньанар, үлэлиир, аһыыр усулуобуйаларын бэлэмнээбит Сииттэ орто  оскуолатын хаһаайыстыбыннай чааһын эппиэттээх үлэһитигэр Анастасия Ивановаҕа,  Сииттэ орто оскуолатын көхтөөх  учууталларыгар, үөрэнээччилэригэр (дириэктэр Андрей Новгородов), «Чуораанчык» уһуйаан иитээччилэригэр, иитиллээччилэригэр (сэб. Ольга Александрова), олохтоох дьаһалта кэлэктиибин үлэһиттэригэр, олохтоох библиотека сэбиэдиссэйигэр Мария Обутоваҕа, «Алаһа» эбээлэр кулууптарыгар (сал. Мотрена Васильева), кэнсиэри иилээн-саҕалаан ыыппыт эдэр уолаттарга Захар Кривошапкиҥҥа, Афанасий Гуляевка, Сииттэ орто оскуолатын, музыка учууталыгар Людмила Поповаҕа, айыыһыттан айдарыылаах алгысчыппытыгар Роман Поповка, «Иэйии» эдэр ийэлэр түмсүүлэригэр (сал. Марианна Захарова), Сииттэ орто оскуолатын минньигэс астаах повардарыгар Людмила Петроваҕа, Елена Платоноваҕа, Айталина Соловьеваҕа, ону кытта ас астыырга көмө буолбут уһуйаан үлэһиттэригэр Анастасия Охлопковаҕа, Екатерина  Алексееваҕа, аһынан-үөлүнэн кыттыспыт аламаҕай майгылаах Сииттэбит тэрилтэтин үлэһиттэригэр,  баһылык солбуйааччытыгар Петр Степановка өссө төгүл махтал маанытын тиэрдэбит.

Марианна Сивцева.