Сииттэҕэ Аан Аартык арылынна

Ханнык баҕарар нэһилиэккэ, улууска тиийдэххинэ, аан бастаан киирии аартыкка киһи хараҕа быраҕыллар.

Алтынньы 11 күнүгэр Сииттэ нэһилиэгэр киирии Аан Аартык үөрүүлээх арыллыыта буолан ааста. Олохтоох бибилэтиэкэр Мария Обутова бу кэтэһиилээх түгэни үөрэ-көтө үллэстэр:

“Күнүс 12 чаастан алгысчыт Роман Попов сахалыы сиэринэн Үрдүк Айыылартан көрдөһөн-ааттаһан, айах тутан ыытта. Ол кэннэ нэһилиэк баһылыга Семен Тимофеев  Аан Аартыгы оҥоруу туох толкуйтан саҕаламмытын мустубут дьоҥҥо, үөрэнээччилэргэ кэпсээтэ. Олохтоох дьаһалта көҕүлээһининэн нэһилиэк олохтоохторугар Аан Аартык  бырайыагар күрэх биллэриллибитэ. Тутатына үчүгэйкээн бырайыак-үлэлэр киирбиттэрэ. Анал хамыыһыйа быһаарыытынан, Сииттэ орто оскуолатын 5 кылааһын үөрэнээччилэрэ (кылаас салайааччыта Анастасия Сидорова) кыайыы өрөгөйүн билбиттэрэ. Бүгүҥҥү тэрээһиҥҥэ Анастасия Григорьевна кылааһын оҕолорун кытта кэлэн үөрүүтүн үллэһиннэ, бырайыакка хайдах кыттыбыттарын кэпсээтэ. Семен Тимофеевич оҕолорго бу курдук төрөөбүт дойдугутунан ханна да сырыттаргыт киэн тутталларыгар, Сииттэлэрин инники сайдыытын туһугар үөрэхтээх үтүө үлэһит буолалларыгар баҕа санаатын тиэртэ уонна сэмэй бэлэҕин туттарда. Семен Тимофеевич бу аартык оноһуллуутугар элбэхтик Эдьиий Дораны кытары сүбэлэспитин, кэпсэппитин, кини сүбэтинэн сахалыы тыыннаах ойуулаах-бичиктээх аартык оҥоһуллубутун сэһэргээтэ. Салгыы бу аартык тутуутугар үлэлэспит уолаттарга Петр Степановка, Дмитрий Колмогоровка, Егор Левиҥҥэ Махтал суруктары туттарда. Аан Аартык олоххо киирбитинэн, нэһилиэкпит дьонун-сэргэтин итиитик-истиҥник эҕэрдэлиибит”.

Онон сииттэлэр нэһилиэктэрин киэргэтэр биир бастыҥ, үйэлээх тутуу оҥоһуллубутунан киэн тутталлар,  дойдуларын көстүүтэ киэркэйэрин туһугар элбэх үлэ ыытылла турарыттан үөрэллэр, астыналлар. Эбиитин оҕолор ис сүрэхтэн үлэлэспит бырайыактара буолан, харыстабыллаахтык сыһыаннаһыахтара диэн эрэнэллэр. Үйэлээх, дьоһун тутуулаах Аан Аартык  ыраахтан-чугастан айанныыр дьону арчылыы, алгыы туруо.