Сииттэҕэ волонтер оҕолор лааҕырдара үлэлиир

Сииттэ нэһилиэгэр сэттис сылын А.В. Аргунов аатынан Норуот айымньытын, култууратын дьиэтин иһинэн оҕо лааҕыра үлэлээн кэллэ. Лааҕыры култуура дьиэтин үлэһиттэрэ тэрийэн үлэлэтэллэр.

“Сайыҥҥы кэмҥэ оҕо дьарыктаах буолара хайаан да наада. Былырыын пришкольнай лааҕыр курдук тэрийбиппит, 5 оҕо сылдьыбыта. Быйыл Оҕо аймах сылынан икки нэдиэлэлээх волонтерскай лааҕыры тэрийдибит, манна сэттэ оҕо бэйэлэрин баҕаларынан үлэҕэ киирдилэр, – диэн кэпсиир Норуот айымньытын, култууратын дьиэтин дириэктэрэ Марианна Сивцева. — Оҕолор олохтоох дьаһалта баһылыгын Семен Тимофеевы уонна солбуйааччытын Петр Степановы кытта анаан көрүстүлэр, үлэ хаамыытын быһаарыстылар.

Кыра да буоллар хамнастарын олохтоох дьаһалта төлүүр буолла. Инникитин олохтоох дьаһалта уонна култуура үлэһиттэрин анал бырайыактарынан оҕолорго пришкольнай учаастагы үлэлэтэр санаалаахпыт. Оччоҕо кыаммат кырдьаҕас дьоҥҥо, элбэх оҕолоохторго оҕуруот аһын удамыр сыанаҕа атыылаан, бэйэлэригэр харчы киллэринэн, эбии дохуот оҥостуо этилэр”.

Волонтер оҕолор уулуссалары эрэ ыраастаабаттар, патриотическай иитиини эмиэ бараллар. Бу күннэргэ салайааччыларын кытта эмтээх оту хомуйа барыахтаахтар.

“Бу маннык үлэлии үөрэнэллэрэ, төрөөбүт дойдуларыгар, дьонноругар туһаны аҕалаллара, барыта инники олохторугар үчүгэйинэн эрэ сабыдыаллыа. Махтаныа этибит Салим Расуловка, Айсен Кондратьевка, Адам Аргуновка, Оля Винокуроваҕа, Оля Тимофееваҕа, Милена Алексееваҕа уонна Надя Ивановаҕа. Инникитин да үүнэр ыччаттарбыт, кэлэр кэскиллэрбит төрөөбүт Сииттэлэрин аатын кэскиллээхтик ааттатыахтара диэн эрэнэбит”, – диэн кэпсээнин түмүктээтэ Марианна Сивцева.