Сииттэҕэ Үйэтитии сыла

РФ Аҕа дойдуну көмүскээччи, СӨ Ийэ дойдуну көмүскээччи, Кэбээйи улууһугар Аҕа дойдуга бэриниилээх буолуу, Сииттэ нэһилиэгэр Үйэтитии сылларын чэрчитинэн байыаннай дьайыыга сылдьар нэһилиэк чулуу уолаттарыгар, этэргэ дылы билиҥҥи кэм дьоруойдарыгар, олохтоох дьаһалта баһылыга Семен Тимофеев көҕүлээһининэн анал истиэндэ оҥоһуллан бастыҥ миэстэҕэ туруорулунна.

Долгутуулаах тэрээһини олохтоох бибилиэтиэкэ сэбиэдиссэйэ Мария Обутова салайан ыытта. Байыаннай дьайыыга сылдьар оҕолордоох дьиэ кэргэттэргэ, нэһилиэк көхтөөх олохтоохторугар баһылык Семен Тимофеев дириҥ ис хоһоонноох махталын тиэртэ. Байыаннай дьайыыга сылдьар оҕолоох Роман Попов, ону кытта чугас аймах быраата, Ийэ дойдутун көмүскүү сылдьар буойун эдьиийэ Ольга Левина ис сүрэхтэн тахсар баҕа санааларын, киһи эрэ уйадыйардыы, бар дьонугар анаата. Кинилэр учуутал идэлээх буоланнар уолаттары оскуолаҕа үөрэппиттэрин, үөрэххэ олус эппиэтинэстээхтэрин, успуорка бэлэмнээхтэрин, билии-көрүү өттүнэн ситиһиилээхтэрин туһунан ахтан-санаан аастылар.

Тэрээһин түмүгэр култуура дьиэтин дириэктэрэ Марианна Сивцева куруук көмө буолар Сииттэ нэһилиэгин дьонугар-сэргэтигэр истиҥник махтанна. Ол кэннэ В.Е. Колмогоров аатынан Сииттэ орто оскуолатын ахсыс кылааһын үөрэнээччилэрэ Нария Новгородова, Ньургун Сивцев Улуу Кыайыы хоһоонун күрэҕэр кыттыбыт биир дойдулаахтарбыт хоһооннорун аахтылар. Күндү оҕолорбут, хорсун-хоодуот уолаттарбыт Кыайыы кынаттаах, этэҥҥэ төрөөбүт дойдуларыгар түргэнник кэлэллэрин туһугар баҕа санаа бастыҥын тириэртибит, айыылартан көрдөстүбүт.