Мария Васильева (СИА) хаартыската
Бүгүн, кулун тутар 30 күнүгэр, Саха Өрөспүүбүлүкэтин муниципальнай тэриллиилэрин сэбиэтин – Муниципалитеттар икки ардыларынааҕы бииргэ үлэлээһин ассоциациятын IX сийиэһэ аһылынна. Сийиэскэ 400-н тахса нэһилиэк уонна улуус баһылыктара дэлэгээт быһыытынан кытта сылдьаллар.
IX сийиэс аһыллыытыгар Муниципалитеттар икки ардыларынааҕы бииргэ үлэлээһин ассоциациятын бэрэссэдээтэлэ Михаил Соров эҕэрдэ тылы эттэ.
Сийиэс бастакы чааһыгар Ил Түмэн бэрэссэдээтэлэ Алексей Еремеев, СӨ Бырабыыталыстыбатын Бэрэссэдээтэлин солбуйааччы Ольга Балабкина, Москва куорат Троицкай куоратын уокуругун баһылыгын олохтоох бэйэни салайыныыны сайыннарыыга сэбиэтин чилиэнэ, Москва куорат муниципальнай тэриллиилэрин бэрэссэдээтэлэ Владимир Дудкин эҕэрдэ тыл эттилэр.
Саха сирин Степной Дууматын төрүттээччи Иван Емельянович Мигалкин аатынан олохтоммут мэтээли олохтоох бэйэни салайыныы сайдыытыгар киллэрбит кылааттарын иһин Бүлүү улууһун баһылыгар Сергей Винокуровка, Нам улууһун баһылыгар Юрий Слепцовка туттардылар.
Мигалкин мэтээлэ Саха Өрөспүүбүлүкэтин муниципальнай тэриллиилэрин сэбиэтин үрдүкү наҕараадатынан буолар.
СӨ Бырабыыталыстыбатын Бэрэссэдээтэлин солбуйааччы Ольга Балабкина олохтоох бэйэни салайыныы сайдыытыгар кылааттарын иһин Өрөспүүбүлүкэ Баһылыгын Махтал суругун Саха Өрөспүүбүлүкэтин муниципальнай тэриллиилэрин сэбиэтин – Муниципалитеттар икки ардыларынааҕы бииргэ үлэлээһин ассоциациятын бэрэссэдээтэлэ Михаил Соровка туттарда.
Салгыы Саха Өрөспүүбүлүкэтин муниципальнай тэриллиилэрин сэбиэтин – Муниципалитеттар икки ардыларынааҕы бииргэ үлэлээһин ассоциациятын бэрэссэдээтэлэ Михаил Соровка сэбиэт ааспыт сыллардааҕы үлэтин түмүгүн кэпсээтэ. Бу сэбиэт саҥа бэрэссэдээтэлин уонна бырабылыанньа чилиэннэрин талар, отчуоттуур-быыбардыыр сийиэс пленарнай мунньаҕа буолар.
Сийиэс иккис чааһыгар Саха Өрөспүүбүлүкэтин муниципальнай тэриллиилэрин сэбиэтин – Муниципалитеттар икки ардыларынааҕы бииргэ үлэлээһин ассоциациятын саҥа бэрэссэдээтэлин таллылар. Дэлэгээттэр бары биир киһи курдук куоластаан саҥа бэрэссэдээтэлинэн Чурапчы улууһун баһылыгын Степан Саргыдаевы таллылар.
Саҥа талыллыбыт бэрэссэдээтэл: «Мин эрэнэбин, барыбыт күүһүнэн туруоруллубут соруктары толоруохпут уонна нэһилиэктэрбит, оройуоннарбыт, өрөспүүбүлүкэбит сайдарын туһугар үлэлиэхпит», -диэн эрэнэрин биллэрдэ.
Арассыыйа олохтоохторо 2026 сылга мунньуллар биэнсийэлэриттэн 440 тыһыынча солкуобайы биир кэмнээхтик ылыахтарын сөп диэн РИА…
Дьокуускайга өрөспүүбүлүкэ муниципальнай тэриллиилэрин бэрэстэбиитэллээх уорганнарын дьокутааттарын III сийиэһин пленарнай мунньаҕын улуустартан уонна нэһилиэктэртэн кэлбит…
Киин куоракка икки күн устата өрөспүүбүлүкэ муниципальнай тэриллиилэрин бэрэстэбиитэллээх уорганнарын дьокутааттарын III сийиэһэ үгүс дьокутааты…
Ил Дархан туһаайан этиитигэр дьоҕус урбааны өйүүр боппуруоска болҕомтотун ууруо диэн, норуот дьокутаата, Ил Түмэн…
“Илии сылааһа” сыах (сал. Саввина И.Е.) филиала Куокуйдааҕы “Надежда” холбоһук (сал. Еремеева Т.У.) бу сылга…
Дьокуускайдааҕы полиция 1-кы №-дээх отделын дьуһуурунай чааһыгар олохтоох дьахтар кини аатыгар сокуоннайа суохтук 145 тыһ.солк.…