Силиэдэбэтэл аҕам саастаах киһиэхэ түөкүттэр уорбут харчыларын төнүннэрэргэ көмөлөстө

ИДьМ Саха сиринээҕи салаатын Дьокуускайдааҕы салалтатын силиэдэбэтэлэ, юстиция ыстаарсай лейтенана Наталья Хабутова аҕам саастаах киһиттэн түөкүттэр төлөпүөнүнэн уорбут харчыларын төннөрөргө көмөлөстө. Бу туһунан ИДьМ Саха сиринээҕи салалтатын пресс-сулууспата иһитиннэрэр.

Түөкүттэр биэнсийэлээх дьахтарга эрийэн, биллэр инвестиционнай хампаанньа үлэһиттэрэбит диэн албыннаан, улахан барыһы эрэннэрэн, харчытын биисинэс-бырайыагы сайыннарыыга угуохха диэн этии киллэрбиттэр.

Түөкүттэр дьахтарга биржаҕа атыы-эргиэн нөҥүө инвестициянан хайдах харчыны элбэтиэххэ сөбүн кэпсээбиттэр, ол кэнниттэн смартфонугар анал сыһыарыыны туруорарга эппиттэр. Эмсэҕэлээччи түөкүттэргэ эрэнэн, элбэх харчыланар баҕаттан, кирэдьиит ылан туран, 380 тыһ. солк. кинилэр анал счеттарыгар ыыппыт. Хас да күн ааспытын кэнниттэн биирдэ кинини албыннаабыттарын өйдөөбүт уонна полицияҕа үҥсүбүт.

Ол кэмҥэ дьуһуурустабыгар сылдьыбыт юстиция ыстаарсай лейтенана Наталья Хабутова түөкүннээһин туһунан үҥсүүнү тута көрөн, ымпыгын-чымпыгын ырытан, уоруйахтар бааҥҥа счеттарын быһааран, холуобунай дьыала тэрийэ охсон, ол чэрчитинэн харчы хамсааһынын тохтоторго дьаһал таһаарбыт. Сотору, силиэдэбэтэл сөптөөх дьаһалын түмүгэр, эмсэҕэлээбит дьахтар харчытын төттөрү ылбыт.

Түөкүттэртэн эмсэҕэлээбит Дьокуускай олохтооҕо Наталья Хабутоваҕа үлэтигэр эппиэтинэстээхтик сыһыаннаһарын уонна кини үҥсүүтүнэн тута дьарыктаммытын иһин махтанна. Итини тэҥэ, аҕам саастаах киһи өрөспүүбүлүкэтээҕи Ис дьыала министиэристибэтин салалтатыгар эдэр үлэһит эппиэтинэстээҕин уонна идэтигэр бэриниилээҕин тоһоҕолоон бэлиэтээтэ.