Силиэдэбэтэллэр Красноярскай кыраайга дьиэ кэргэн туохтан сүһүрбүтүн  быһаардылар

Бу  күннэргэ Красноярскай кыраайга оҕолор сүһүрэн өлбүттэрин туһунан иһитиннэрии социальнай ситимнэринэн тарҕаммыта. Эспэртиисэ  дьиэ кэргэн сүһүрүүтэ уонна онтон сылтаан үс оҕото өлүүтүгэр биллибэт сүһүрдэр вещество буолбутун быһаарбыт. Бу туһунан СК ГСУ эрэгийиэннээҕи пресс-релиһигэр этиллэр.

Красноярскай кыраайга  Назаровскай оройуоҥҥа элбэх оҕолоох ыал киэһээҥҥи аһылыгар маҕаһыынтан атыыласпыт кууруссаларын уонна бэлимиэннэрин сиэбиттэр. Бу аһылыктан сылтаан үс оҕолоро суорума суолламмыт. Билигин оҕолор төрөппүттэрэ уонна биир оҕо өссө да балыыһаҕа сыталлар.

“Эспиэрдэр барыллаан быһаарбыттарынан, кинилэр туга биллибэт сүһүрдэр дьайыылаах веществоттан сылтаан өлбүттэр.

Оҕолор өлүүлэрэ туохтан тахсыбытын чуолкайдыырга эбии чинчийии ыытыллыаҕа.

Маныаха силиэстийэ тахсыбыт быһылаанынан хас да сабаҕалааһыны оҥорор, итинтэн сүрүннэрэ – аһылыкка туга биллибэт веществоны туһаныы.

Силиэстийэлиир кэмитиэт бородуукта маҕаһыынын бас билээччини уонна атыыһытын, Красносопинскайдааҕы амбулатория биэлсэрин, бу ыал аймахтарын доппуруостаабыт, маҕаһыынтан камераны көрөөрү ылбыттар.

Алексей Рыбин