“Силис” хаһаайыстыба 46 ынах сүөһүнү кыстатан туруорар

Өлүөхүмэ улууһун Уолбут нэһилиэгэр 6 кылаас үөрэнээччилэрэ Марилена Николаева уонна Таня Худаева бэйэлэрин нэһилиэктэрин сонуннарын кэпсиир роликтары усталлар.

Бу сырыыга кинилэр Худаевтар дьиэ кэргэннэригэр ыалдьыттаабыттар.

Ыал аҕа баһылыга Александр Худаев “Силис” бааһынай хаһаайыстыбатын 1997 сылтан тэринэн үлэлэлтэр. Быйыл 21 ынаҕы, уопсайа 46 төбөнү кыстатан туруораллар. Билиҥҥи туругунан икки ынах төрөөбүт.

“Саамай кыһалҕалааҕа, от тиийбэт. Быйыл кураан буолан, от аҕыйах. УСХ нөҥүө от атыылаһыахтаахпыт, бэйэм Даппарайтан атыыласпытым. Олохтоох дьаһалта сайын тыраахтар уларсар, туох кыалларынан көмөлөһөр”, — диир Александр.

1997 сылтан хаһаайыстыба тэринэн, биир да күнү өрөөбөккө үлэлии сылдьар Александр уонна Борис Худаевтар сайынын оттоон, кыһынын сүөһү көрөн, саха төрүт олоҕун уйгутун уһанса сылдьаллар. Кыргыттар кинилэргэ сүөһүлэрин сүүс бырыһыан кыстыгы этэҥҥэ туоратан, күөххэ үктэннэрэллэригэр алгыстарын тиэртилэр.

Бу дьиэ кэргэн ийэтэ Альбина Михайловна 2014 сыллаахтан айылҕа көстүүлэрин тугу бэлиэтии көрбүтүн сурунар идэлээх эбит. Ол курдук кини бэлиэтээһиннэригэр бырдах, хамсыыр харамай (тигээйи, тоҕоноччу) төһө элбии-аҕыйыы сылдьыбыттарын сылларынан кытта билиэххэ сөп.

Хайа сылга ханнык сир аһа, сыалаах эриэхэ (кедр) өлгөмнүк үүммүтүн Альбина Михайловна тэтэрээтиттэн булуохха сөп. Салгыы тэниттэххэ, билим үлэтэ да тахсыан сөп, диэн бэлиэтииллэр кыргыттар.